काठमाडौ । प्रमुख प्रतिपक्षी दल नेपाली कांग्रेसका सांसदहरुले सेक्युरिटी प्रिन्टिङ प्रेस स्थापनाका लागि पूर्वसञ्चारमन्त्री गोकुल बाँस्कोटा संलग्न भएको भनिएको अडियो सामग्रीको सत्य तथ्य सदनलाई जानकारी गराउन सरकारको ध्यानाकर्षण गराएका छन् ।
प्रतिनिधिसभाको बुधबारको बैठकको शून्य समयमा बोल्दै कांग्रेसका सांसदहरुले मन्त्री संलग्न भएको भनिएको घटनालगायतका पछिल्ला घटनाबारे सदनलाई स्पष्ट पार्न प्रधानमन्त्रीको ध्यानाकर्षण गराएका हुन् ।
सांसद राजेन्द्रकुमार केसीले पूर्वसञ्चारमन्त्री बाँस्कोटा संलग्न भएको भनिएको ७० करोड रुपैयाँ कमिसनलगायत पछिल्ला घटनाबारे सदनलाई जानकारी गराउन सरकारको ध्यानाकर्षण गराउनुभयो । आफ्ना कामको जस लिन लामो समय लिन सक्ने सरकारले सेक्युरिटी प्रिन्टिङ प्रेसमा भएको भनिएको ७० करोडको कमिसनको अडियो सामग्रीबारे जवाफदेही नभएको भन्दै उहाले आक्रोश पोख्नुभयो ।
उहाले भन्नुभयो, ‘आफ्ना जस लिन २/२ घण्टा रोस्टम कब्जा गर्ने प्रधानमन्त्रीजी आज यत्रो ठूलो काण्डैकाण्ड मच्चिँदा उहाले जवाफ दिनुपर्ने कि नपर्ने ?’
सांसद रामबहादुर विष्टले सेक्युरिटी प्रिन्टिङ प्रेस स्थापना प्रकरणमा पूर्वसञ्चारमन्त्री बाँस्कोटा र विजय मिश्रबीच ७० करोडको भ्रष्टाचारसम्बन्धी अडियो टेप सार्वजनिक भएको धेरै दिन भइसक्दा पनि सरकारले सदनलाई स्पष्ट नभनेको भन्दै यसबारे सत्यतथ्य जानकारी गराउन सरकारको ध्यानाकर्षण गराउनुभयो ।
प्रतिक्रिया