स्याङ्जा पनि कोरोनाबाट मुक्त रहेन, ३ जनामा संक्रमण पुष्टी

पोखरा । अहिले सम्म ग्रीनजोनकारुपमा रहेको स्याङ्जा जिल्लामा पनि कोरोना संक्रमित पुष्टी भएको छ । बिहीबार बिहान पोखराको प्रदेश प्रयोगशालामा गरिएको स्वाव परीक्षणमा तीन जनामा कोरोना संक्रमण पुष्टि भएको हो । योसँगै नेपालमा संक्रमितको संख्या नौ सय ८० पुगेको छ।

पोखरामा गरिएको स्वाब परीक्षणका क्रममा एक महिलासहित तीन जनामा संक्रमण पुष्टि भएको गण्डकी प्रदेशको सामाजिक विकास मन्त्रालय अन्तर्गतको स्वास्थ्य निर्देशनालयले जनाएको छ।

वालिङका २२ र २६ वर्षका दुई पुरुष तथा वालिङकै ३९ वर्षकी एक महिलामा संक्रमण पुष्टि भएको स्वास्थ्य निर्देशनालयले पुष्टी गरेको छ। संक्रमण पुष्टि भएका तीनैजना गाउँपालिकाले सञ्चालन गरेको क्वारेन्टाइनमा थिए।

उनीहरुलाई गाउँको क्वारेन्टाइनबाट सदरमुकामस्थित सरकारी अस्पतालमा ल्याउने तयारी भइरहेको निर्देशनालयले जारी गरेको प्रेस विज्ञप्तिमा उल्लेख छ। योसँगै गण्डकी प्रदेशमा कोरोना संक्रमितको संख्या १५ पुगेको छ।
आजै प्रदेश २ मा ७६ जनामा कोरोना पुष्टि भएको थियो।