बाजा बजाएर क्वारेन्टाइनबाट बिदाई गरिएकामा कोरोना संक्रमण पोजेटिभ

बुटवल । कोरोना भाइरसको परिक्षण रिपोर्ट नआउंदै क्वारेन्टाईनबाट बिदा गरिएकाहरुमा पोजेटिभ रिपोर्ट आएपछि प्रहरीलाई उनीहरुको खोजी गर्न भ्याईनभ्याई भएको छ ।

बाँकेको राप्तीसोनारी गाउपालिकाको वडानं ८ को क्वारेन्टाईनमा बसेकाहरुको कोरोना परीक्षणको नतिजा नआउदै घर पठाईएकोमा उनीहरुलाई बिदा गरेलगत्तै केहिको रिपोर्ट पोजेटिभ आएको छ । उनीहरुलाई स्थानीय गांउपालिकाले भब्य कार्यक्रमको आयोजना गरी घर पठाएको थियो ।

राप्ती सोनारी–८ शिवशक्ति माविको क्वारेन्टाइनमा राखिएको २८ जनाको स्वाब संकलन गरिएकोमा उनीहरुको बिदाई गरिएपछि ५ जनामा संक्रमण रहेको रिपोर्ट आएको छ ।

वडाका जनप्रतिनिधि र स्वास्थ्यकर्मिको चरम लापरवाहीका कारण कोरोना परिक्षणको रिर्पोट नआउँदै उनीहरुलाई बिदाई गरिएको थियो । नतिजा बाहिर नआउदै फुलमाला लगाएर बाजागाजासहित घर पठाइएको थियो । बिदाई गरेको केही समयपछि आएको नतिजामा ५ जनामा कोरोना पुष्टि भएपछि उनीहरुको खोजतलास गर्न प्रहरी परिचालन गरिएको थियो । उनीहरुलाई घर घरबाट खोजेर आईसोलेशनमा ल्याईएको प्रहरीले जनाएको छ ।

उनीहरु घर पुग्दासम्म सम्पर्कमा आएका ब्यक्तिहरुको पनि स्थानीय तह र प्रहरीले खोजी सुरु गरेको छ ।

पोजिटिभ रिपोर्ट आएलगत्तै संक्रमितहरुलाई गांउकै क्वारेन्टाईनमा निर्माण गरिएको आईशोलेशनमा ल्याईएको छ ।

स्थानीय प्रहरी चौकीका ईन्चार्ज तथा प्रहरी सहायक निरिक्षक कुमार केसीले नतिजा आएपछि सबैलाई पुनः घरघरबाट खोजेर क्वारेन्टाईनमा राखिएको जानकारी दिनुभयो । उनीहरु सबै भारतबाट आएका हुन ।