काठमाडौं । धुलिखेल अस्पतालमा मृत्यु भएकी सुत्केरीको थप परीक्षण भैरहेको स्वास्थ्य तथा जनसंख्या मन्त्रालयले जनाएको छ ।
उच्च ज्वरो र श्वासप्रश्वासमा समस्या भएकी सिन्धुपाल्चोक बाह्रबिसेकी २९ बर्षिया महिलालाई गत बिहीबार धुलिखेल अस्पताल पुर्याइएको थियो । तर, उनको अस्पताल पुर्याए लगत्तै मृत्यु भएको थियो ।
सुरुमा गरिएको आरडीटी परीक्षण पोजेटिभ देखिएपछि उनको धुलिखेल अस्पतालमै पीसीआर परीक्षण गरिएको थियो । पीसीआर परीक्षण शंकास्पद देखिएपछि थप जाँचका लागि केन्द्रीय जनस्वास्थ्य प्रयोगशाला पठाइएको छ ।
यससम्बन्धमा विस्तृत विवरण संकलन गरेको भन्दै स्वास्थ्य तथा जनसंख्या मन्त्रालयका प्रवक्ता डा. विकास देवकोटाले थप अनुसन्धान भैरहेको बताउनुभयो । ‘विस्तृत विवरण लिइरहेका छौँ । कोरोनासँग सम्बन्धित थप परीक्षण भइरहेका छन् । रिपोर्ट आएपछि कोरोनाका कारण मृत्यु भएको हो/होइन भन्ने कुरा निक्र्यौल गरेर आधिकारिक रुपमा जानकारी दिनेछौँ ’ उहाँले भन्नुभयो ।
मृतक महिलाको आफन्तको समेत स्वाब निकालेर परीक्षण सुरु गरिएको छ । अस्पतालले शनिबार दिउँसो मृतकको श्रीमान, सासु र नन्द र नवजात शिशुको स्वाब परीक्षण गर्न थालिएको हो ।
प्रतिक्रिया