पाकिस्तानका प्रधानमन्त्री इमरान खानले भारतलाई कोरोना भाइरस विरुद्ध लड्न मद्दत गर्ने प्रस्ताव गरेका छन् ।
प्रधानमन्त्री खानले कोरोना प्रभावित भारतीय जनताका लागि पाकिस्तानको एहसास कार्यक्रममार्फत सहयोग गर्ने बताएका हुन् ।
खानले ट्वीट गर्दै भनेका छन्, ‘लकडाउनका कारण भारतबासी नराम्रोसँग प्रभावित भएका छन् । उनीहरुलाई सहयोग गर्न पाकिस्तानको एहसास कार्यक्रमको प्रयोग गर्नका लागि प्रस्ताव गर्दछु ।’
पाकिस्तानमा एहसास कार्यक्रममार्फत गरिब परिवारलाई आर्थिक सहायता दिईदै आएको छ । कोरोना भाइरसको महामारीसुरु भएपछि गरिएको लकडाउनका बीचमा समस्यामा परेका पाकिस्तानी नागिरकलाई आर्थिक मद्दत गर्न यो कार्यक्रम प्रभावकारी ढ्रंगले प्रयोग गरिएको छ ।
पाकिस्तानमा एहसास कार्यक्रमका प्रमुख सानिया निस्तरले ट्वीट गर्दै एक करोड बढी पाकिस्तानी जनतालाई १२१ अर्ब पाकिस्तानी रुपैयाँ मद्दत गरेको जनाएकी छन् ।
कोरोना भाइरस फैलिनबाट रोक्न भन्दै भारतले गत चैत्र १२ गतेबाट लकडाउन लगाउन सुरु गरेको थियो । लकडाउनका कारण भारतका करोडौं गरिब जनता नराम्रोसँग प्रभावित भएका छन् । कतिपय भारतीय खान नपाएर मृत्यु भएको समाचार भारतीय संचारमाध्यममै प्रकाशित प्रसारित गरिएका छन् ।
अमेरिकाका दुई विश्वविद्यालय एवं मुम्बईस्थित एक संस्थाको रिपोर्ट अनुसार लकडाउनका कारण ८४ प्रतिशत घरपरिवारको आम्दानी घटेको छ । यसका साथै ३४ प्रतिशत जनता अरुको सहायता विना एकहप्ता बढी बस्न सक्दैनन् ।
भारत र पाकिस्तानबीच दुश्मनीपूर्ण सम्बन्ध रहँदै आएको छ ।
-एजेन्सी
प्रतिक्रिया