पाल्पा । पाल्पाको पूर्वखोलाका कोरोना संक्रमणका कारण मृत्यु भएका पुरुषको शव व्यवस्थापनमा संलग्न २ सुरक्षाकर्मीमा कोरोना संक्रमण पुष्टि भएको छ ।
जिल्लाको पूर्वखोला गाउँपालिका १ सिलुवाका ४५ वर्षीय पुरुषको कोरोना भाइसरका कारण मृत्यु भएकोमा उनको शव व्यवस्थापनमा संलग्न नेपाली सेनाका दुईजना जवानमा कोरोना संक्रमण पुष्टि भएको स्वास्थ्य कार्यालय पाल्पाले जनाएको छ ।
शव व्यवस्थापनमा सहभागी भएका तानसेन नगरपालिका ६ स्थित नेपाली सेनाको गोखदल गणका ३३ र ३४ वर्षका पुरुषको पिसिआर परीक्षणको क्रममा कोरोना भाइरस पोजेटिभ देखिएको स्वास्थ्य कार्यालय पाल्पा प्रमुख बिश्व न्यौपानेले जानकारी दिए । न्यौपानेका अनुसार उनीसंगै शव व्यवस्थापन कार्यमा संलग्न एकजना पुरुषको भने कोरोना नेगेटिभ आएको छ ।
लामो समय पीपीई लगाउंदा गर्मीका कारण आएको पसिना पुछ्ने क्रममा वा लगातारको वर्षाका कारण पीपीईबाट पानी छिरेर पुछ्ने क्रममा संक्रमण भएको हुन सक्ने स्वास्थ्य कार्यालय प्रमुख न्यौपानेले अनुमान गरेका छन् ।
स्वास्थ्य सुरक्षा सामाग्रीको उपयोग गर्दा कोरोना संक्रमणबाट जोगिन सकिने भएपनि सामाग्रीको गलत प्रयोग र प्रयोग बिधि नमिलेको अवस्थामा जोखिम हुन सक्ने बिज्ञहरुले बताउंदै आएका छन् ।
फाईल फोटो
प्रतिक्रिया