काठमाडौं । कोभिड १९ का कारण निर्धारित मितिमा हुने वा नहुने आशंकामा परेको नेपाल उद्योग बाणिज्य महासंघको महाधिवेशनका सम्बन्धमा नेपाल उद्योग वाणिज्य महासंघका उपाध्यक्ष चन्द्रप्रसाद ढकालले साउन २६ र २७ गते नै महासंघको महाधिवेसन हुने दाबी गरेकाछन् ।
गत चैतमा गर्नुपर्ने महाधिवेसन कोभिड १९ रोकथामका लागि जारी गरिएको लकडाउनका कारण साउन २६ र २७ गते सारिएको थियो । उपाध्यक्ष ढकालले महामारीको अवस्था कायम रहेपनि महाधिवेसन नसर्ने बताए । शुक्रबार चन्द्रागिरी हिल्सको अवस्थाका बारेमा जानकारी दिन चन्द्रागिरी पुगेका उपाध्यक्ष ढकालले पत्रकारहरुसँग कुरा गर्दै तोकिएको मितिमै महाधिवेसन गर्ने गरी महासंघका कार्यक्रमहरु अगाडि बढेको बताए । महाधिवेसनका लागि काठमाडौंमा आउनुपर्ने १ सय ५ जिल्ला नगर उद्योग वाणिज्य संघका नेतृत्व र वस्तुगत संघका नेतृत्व सहित गरी करिब ४ सयको संख्यामा रहने प्रतिनिधिलाई सामाजिक दुरी कायम गरी महाधिवेशनको ब्यवस्थापन गरिने उनले बताए ।
उनले लकडाउन भन्दा पहिला चुनावी क्रियाकलापहरु बढेको भएपनि सहमतिमा चुनावमा सहभागिता जनाउन सकिने ठाउँ बांकी नै रहेको स्पष्ट पारे । वरिष्ठ उपाध्यक्षका लागि उम्मेदवारी दिने घोषणा गरेका ढकालले चुनावलाई केन्द्रीत गरेर कुनै गुटगत राजनीति नगरेको बताए ।
उपाध्यक्ष ढकालले स्वास्थ्य सुरक्षाका पोर्टोकलहरुलाई कार्यान्वयन गरी व्यवसायिक क्षेत्र खोल्न सरकारले वातावरण बनाउनुपर्ने माग महासंघले राख्दै आएको बताउंदै सबै क्षेत्रका उद्योग व्यवसायलाई ५० प्रतिशतको क्षमतामा चलाउने गरी पोर्टोकल तयार गरी अर्थतन्त्रलाई चलायमान बनाउन सरकारको ध्यान जानुपर्ने बताए । उनले पर्यटकीय स्थल मात्र नभएर होटल व्यवसाय, एयरलाइन्स लगायतका क्षेत्रलाई पनि सुरक्षित रुपमा सञ्चालन गर्न दिनुपर्ने माग गरे ।
सरकारले असार १ गतेदेखि आंशिक रुपमा व्यवसाय गर्ने वातावरण बनाएको तर व्यवसायका क्रियाकलापहरु प्रभावित भएकाले अझै व्यवस्थित पोर्टोकल तयार गरी सबै क्षेत्रलाई खोल्नुपर्ने उनको भनाई छ । कुनै एक क्षेत्रमात्रै खोल्दा अर्थतन्त्र चलायमान हुन नसक्ने भएकाले पर्यटकीय क्षेत्र मात्रै नभई होटल तथा एयरलायन्सलाई समेत खोल्नुपर्नेमा उनले जोड दिए ।
नेपालमा कोभिड १९ को महामारी प्रवेश गर्नु अघि महासंघको चुनावी माहोल तातेको भएपनि सरकारले लकडाउन जारी गरेपछि माहासंघको चुनावी सरगर्मि एक्कासी सेलाएको थियो ।
प्रतिक्रिया