गोरखामा कोरोनाबाट मृत्यु भएका व्यक्तिको शव व्यवस्थापनमा अवरोध, प्रहरीबाट हवाईफायर

गोरखा । शनिबार बिहान मृत्यु भएका कोरोना संक्रमितको शव व्यवस्थापनमा स्थानीयबासिन्दाले अवरोध गरेपछि प्रहरीसँग झडप भएको छ । त्यसक्रममा प्रहरीले केही राउण्ड अश्रुग्याँस समेत प्रहार गरेको छ ।

गोखराको पालुङटार नगरपालिका–७ का ४४ वर्षीय पुरुषको शव व्यवस्थापन गर्ने विषयमा स्थानीय बासिन्दाले अवरोध गरेका थिए ।

जिल्ला सुरक्षा समितिले मृतकको शवलाई गोरखा नगरपालिका–१२ र शहीद लखन गाउँपालिका–१ को सीमा क्षेत्र लुदी दोभानमा व्यवस्थापन गर्ने निर्णय गरेको थियो । तर, त्यस क्षेत्रका बासिन्दाले आफ्नो क्षेत्रमा कोरोना संक्रमितको शव व्यवस्थापन गर्न पाईंदैन भन्दै विरोध गरेका थिए ।

असार १६ गते कतारबाट आएका ती पुरुषको गोरखा अस्पतालमा उपचारको क्रममा शनिबार बिहान मृत्यु भएको थियो ।

यसैबीच स्वास्थ्य तथा जनसंख्या मन्त्रालयले कोरोनाबाट मृत्यु भएका व्यक्तिबाट कोरोना नसर्ने भन्दै शव व्यवस्थापनमा अवरोध नगर्न सबैपक्षलाई आग्रह गरेको छ ।