धरान । सुनसरीको सिमावर्ती क्षेत्र हरिनगर गाउँपालिकाको घुस्कीमा गएराति सिमा वारपार गर्ने अपराधीक समूह र सशस्त्र प्रहरीबीच झडप भएको छ ।
सिमामा अपराधीक क्रियाकलाप गर्ने समूहले सशस्त्र प्रहरीले बोकेको हतियार खोस्न खोज्दा झडप भएको बताईएको छ । हतियार खोसाखोसा हुने क्रममा गोली लागि १ जना अपराधीक समूहका एक व्यक्ति गम्भीर घाइते भएका छन् ।
सशस्त्र प्रहरीको नम्वर ४ गण सुनसरीका प्रमुख एसपी कृष्ण ढकालले दिएको जानकारी अनुसार, हरीनगर गाउँपालिका ७ को घुस्कीमा राति भारतबाट आएका समूहले डिउटीमा खटिएका सशस्त्र प्रहरीले बोकेको हतियार खोस्ने क्रममा लोड गरिएको बन्दुक पड्किँदा एक जना तस्करको पेटमा गोली लागि गम्भीर घाइते भएका छन् ।
घाइते हुने हरीनगर ७ घुस्कीका २० वर्षीय सहजद जट अन्सारी रहेका छन् । उनको अहिले बीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
झडपको क्रममा एक जना सशस्त्र प्रहरी जवान पनि घाईते भएका छन् । झडपका क्रममा सशस्त्र प्रहरी जवान जीवराज विसुन्खे पनि घाईते भएको सशस्त्र प्रहरीले जनाएको छ । उनको टाउकोमा चोट लागेको छ । घाईते जवान विसुन्खेको पकली हस्पिटलमा राखेर उपचार गरिरहेको छ ।
भारत तर्फबाट राति सामान ओसारपसार गर्ने समूहले सिमामा खटिएका सशस्त्र प्रहरीको हतियार खोस्न खोजेपछि राति ९ बजे झडप भएको थियो ।
भारत तर्फबाट तस्करको ठूलै समूहले बीओपीमा खटिएका सुरक्षाकर्मीलाई आक्रमण गरेको जिल्ला प्रहरी कार्यालय सुनसरीले पुष्टि गरेको छ ।
घटनास्थलमा अहिले ठूलो संख्यामा नेपाल प्रहरी र सशस्त्र प्रहरी तैनाथ गरिएको छ ।
प्रतिक्रिया