काठमाडौं । यो बर्ष गोसाइँकुण्ड मेला स्थगित भएको छ । हरेक बर्ष जनैपूर्णिमामा लाग्ने पवित्र तीर्थस्थल गोसाइँकुण्ड मेला यो बर्ष कोभिड–१९ को सङ्क्रमण रोक्न भेला हुन नदिने सरकारको निर्णयपछि स्थगित गरिएको हो ।
सरकारको निर्णयलाई पालना गर्दै यही साउन १५ गते पुत्रदा एकादशीदेखि १९ गते जनैपूर्णिमा पर्वसम्म लाग्ने विशेष धार्मिक मेला स्थगन गरिएको गोसाइँकुण्ड क्षेत्र विकास समितिले जनाएको हो ।
समितिका अध्यक्ष सञ्जीव डिएमले शुक्रबार प्रेस विज्ञप्ति जारी गर्दै गोसाइँकुण्ड जाने यात्रुका लागि बास बस्न तयार गरिने अस्थायी छाप्रोलगायत सबै प्रकारका काम बन्द गरिएको बताए ।
प्रत्येक वर्ष गङ्गा दशहरा पर्वमा १० दिन र जनैपूर्णिमा पर्वका अवसरमा पाँच दिन पवित्र तीर्थस्थल गोसाइँकुण्ड मेला लाग्ने परम्परा रहिआएको छ ।
कोरोना सङ्क्रमणका कारण गत जेठ महिनाको दशहरा पर्वसमेत प्रभावित बनेको बताउँदै अध्यक्ष डिएमले रोग नियन्त्रण भएपश्चात् समितिको तर्फबाट धार्मिक क्षेत्रमा गर्नुपर्ने सेवा निरन्तररूपमा अगाडि बढ्ने जानकारी दिए ।
प्रतिक्रिया