वीरगन्जका मेयरको परिवारमा पनि कोरोना संक्रमण पुष्टि

वीरगन्ज । कोरोना संक्रमित भएका वीरगन्ज महानगरपालिकाका नगर प्रमुख विजयकुमार सरावगीको परिवारका २ जना सदस्यमा पनि कोरोना पुष्टि भएको छ ।

सरावगीको कन्ट्याक्ट ट्रेसिङका आधारमा लिईएको पहिलो चरणको नमुना परीक्षणमा परिवारका २ जना सदस्यमा कोरोना पुष्टि भएको हो ।

उनका परिवारका दुई सदस्यसहित ६ जनाको रिपोर्ट पोजेटिभ आएको छ ।

पर्सामा मात्र पछिल्लो २४ घण्टामा थप ४५ जनामा कोरोना भाइरस संक्रमण पुष्टि भएको छ ।

नारायणी अस्पतालस्थित पीसीआर प्रयोगशालामा परीक्षण गर्दा १४ जना महिलासहित ४५ जनामा कोरोना संक्रमण पुष्टि भएको हो ।

नारायणी अस्पतालका अनुसार संक्रमितमध्ये अधिकांश समुदायमा गरिएको परीक्षणका क्रममा भेटिएका हुन् । कन्ट्याक्ट ट्रेसिङ र शुल्क तिरेर पीसीआर गराएकामा पनि कोरोना संक्रमण देखिएको छ ।

नारायणी अस्पतालको प्रयोगशालाबाट आएको रिपोर्टका अनुसार ४३ जना वीरगन्जका छन् भने सखुवा प्रसौनी गाउँपालिका र निर्मलबस्तीका एक–एक जनामा कोरोना संक्रमण देखिएको छ ।