नरभक्षी चितुवाको आक्रमणबाट तनहुँमा एक बालकको मृत्यु

तनहुँ । चितुवाको आक्रमणबाट तनहुँको शुक्लागण्डकी नगरपालिका–२ मसारमा बुधबार साँझ डेढ वर्षीय बालकको मृत्यु भएको छ ।

मृत्यु हुनेमा सोही ठाउँका विष्णुकुमार रानाका कान्छा छोरा नारायण राना रहेको इलाका प्रहरी कार्यालय बेलचौताराले जनाएको छ ।

घरको पिँढीमा बसिरहेको बेला चितुवाको आक्रमणमा परेर बालकको ज्यान गएको इलाका प्रहरी कार्यालय बेलचौताराका प्रहरी निरीक्षक जगदीश रेग्मीले जानकारी दिए ।

साँझको बेला छोरालाई पिढीमा राखेर भित्र कपडा लिन जाँदा आक्रमण गरेको उनले बताए ।

स्थानीयले खोजी गर्दा करिव डेढ किलोमिटर जिपे बाँझोगरा भन्ने स्थानमा ती बाललको दाहिने हात र टाउको फेला परेको थियो ।

उनका अनुसार टाउको र हात भेटिएको छ । शरीरका अन्य भागको स्थानीयको सहयोगमा खोजी भइरहेको छ ।