काठमाडौं । गैर आवासीय नेपाली संघबाट संचालित एनआरएन इन्फ्रास्टक्चर एण्ड डेभलपमेन्ट लिमिटेडले सर्वसाधारणलाई जारी गरेको साधारण सेयरको बाँडफाँड साउन २७ गते मंगलबार हुने भएको छ ।
कम्पनीको बिक्री प्रबन्धक सानिमा क्यापिटलले मंगलबार विहान ९ बजे सेयर बाँडफाड गर्ने जनाएको हो । कम्पनीले प्रतिकित्ता १०० अंकितका दरले करिब ३४ करोड रुपैंया बराबरको कुल ३३ लाख ९८ हजार ४६ कित्ता साधारण शेयर निष्काशन गरेको थियो।
जसमध्ये ५ प्रतिशत अर्थात १ लाख ६९ हजार ९०२ कित्ता सामूहिक लगानी कोषको लागि छुट्टाएको थियो भने २ प्रतिशत अर्थात ६७ हजार ९६१ किता शेयर कर्मचारीहरूका लागि छुट्टाएको थियो ।
यस्तै बाँकी ३१ लाख ६० हजार १८३ कित्ता शेयर सर्वसाधारणलाई बिक्री गरेको थियो । साधारण सेयरको लागि ४ लाख २८ हजार १५३ जना आवेदकबाट १ अर्ब ६५ करोड ६७ लाख ६० हजार रुपैयाँ बराबरको आवेदन परेको थियो जसमा १ करोड ६५ लाख ६७ हजार ६०० कित्ताको माग भएको छ। यो माग भन्दा ५.२४ गुणा बढी हो ।
सेयरको माग हेर्दा कम्पनी गैर आवासीय नेपाली संघबाट संचालित भएको हुनाले लगानीकर्ता आकर्षित भएको बुझिन्छ ।
प्रतिक्रिया