दमौली । पीसीआर रिपोर्ट नेगेटिभ आउँदा पनि तनहुँको भानु नगरपालिका–११ मा नगरपालिकाका एक प्राविधिक र स्वास्थ्यकर्मी नै सामाजिक बहिष्कारमा परेका छन् ।
एकैसाथ स्वाब सङ्कलन गरिएकासँगै काम गर्ने एक इन्जिनियरलाई कोरोना पोजिटिभ देखिएपछि वडा अध्यक्ष र टोल विकास संस्थाका अध्यक्षसहितका गाउँलेले ती प्राविधिक र उनलाई घरमा आश्रय दिने उनकी दिदीलाई सामाजिक बहिष्कार गरेको पीडितहरूले बताएका छन् ।
पीसीआर परीक्षणमा नेगेटिभ रिपोर्ट आएका नगरपालिकाका ओभरसियर सन्दीप अधिकारी र उनकी दिदी रुपाकोट स्वास्थ्य चौकीमा कार्यरत अनमी अन्जना अधिकारी पौडेललाई टोल विकास संस्थाले नै निर्णय गरेर घर भित्रै नजरबन्द गरेको छ । आफ्नो रिपोर्ट नेगेटिभ आए पनि अधिकारी केही दिन क्वारेन्टाइनमा बस्ने गरी घर आएका थिए ।
तर आफ्नो घर साँघुरो भएको कारण नजिकै रहेको दिदीको घरको धन्सारमा बस्न अधिकारी गएका थिए । तर गाउँलेहरूले कोरोना सङ्क्रमितसँग बसेर आएको भन्दै अधिकारीलाई घरमा नराख्न आफूलाई दबाब दिएको अन्जनाले बताइन् ।
भाइको लागि छुट्टै धारा र शौचालयको व्यवस्था गरेकी थिएँ’, अन्जनाले भनिन्, ‘तर गाउँलेहरूले भाइलाई घरमा बस्न दिएको भन्दै मलाई पनि घरबाट बाहिर ननिस्कन दबाब दिनुभयो ।’ वडा अध्यक्ष तारानरेश पौडेलको उपस्थितिमा भएको टोल विकास संस्थाको बैठकले नै आफूलाई पनि घरबाट बाहिर निस्कन प्रतिबन्ध लगाएको उनले बताइन् ।
आफू स्वास्थ्य संस्थामा कार्यरत रहेको र स्वास्थ्य सुरक्षाका सबै मापदण्ड पूरा गरेको बताउँदा पनि टोल विकास संस्थाका पदाधिकारीले घरबाट बाहिर निस्कन नदिएको, पशु चौपायलाई घाँस पानी हाल्न जान पनि नदिएको गुनासो गरिन् । उक्त समाचार आजको गोरखापत्रमा छापिएको छ ।
प्रतिक्रिया