बाँकेमा ९ जना कोरोना संक्रमित थपिँदा २६ जना कोरोना मुक्त भएर घर पुगे

नेपालगञ्ज । बाँकेमा मगंलबार २६ जनाको डिस्चार्ज हुँदा ९ जना कोरोना संक्रमित थपिएका छन् ।

भेरी अस्पताल नेपालगञ्जको प्रयोगशालामा गरिएको पीसीआर परीक्षणमा भेरी अस्पतालका एक जना चिकित्सक, एभरेष्ट बैंकका २ जना कर्मचारी, वडा प्रहरी कार्यालय नेपालगञ्जका एकजना प्रहरी, नेपालगञ्जको वडा नम्बर ४ का ३ जना स्थानीय तथा वडा नम्बर १ र ९ का एकएक जना स्थानीयमा कोरोना पुष्टि भएको छ ।

बाँकेमा मंगलबार नै बिभिन्न आइसोलेसनबाट २६ जना कोरोना मुक्त भएर घर फर्केका छन् । मंगलबार डिस्चार्ज हुनेहरु ५ जना खुल्ला कारागार र २१ जना होटल सिटी प्लाजा आइसोलेसनमा बसेर उपचार गराईरहेकाहरु हुन् । उनीहरु साउन २७ गते कोरोना संक्रमण पुष्टि भएर आइसोलेसनमा बसेका थिए ।

योसंगै बाँकेमा कोरोना संक्रमितको संख्या ८ सय ४४ पुगेको छ । यी मध्ये ६ सय ५४ जना डिस्चार्ज भएका छन् भने जिल्लामा ४ जनाको मृत्यु भएको छ ।

भेरीमै गरिएको परीक्षणमा बर्दियाका ६ जनामा पनि कोरोना देखिएको छ । ठाकुरबाबा नगरपालिकाका ४ जना तथा बढैयाताल गाउँपालिका र राजापुर नगरपालिकाका एकएक जनामा कोरोना पुष्टि भएको अस्पतालले जनाएको छ ।