काठमाडौं । नेपाल कम्युनिष्ट पार्टी (नेकपा)का उपाध्यक्ष वामदेव गौतमलाई राष्ट्रियसभा नियुक्ति गैरकानुनी भएको जिकिर गर्दै सर्वोच्च अदालतमा रिट परेको छ ।
रिट निवेदनमा गौतमलाई राष्ट्रियसभा सदस्यका रुपमा काम गर्न रोक्नु भन्ने आदेश माग गरिएको छ ।
वरिष्ठ अधिवक्ता दिनेश त्रिपाठीले गौतमको नियुक्ति संविधान विपरित भएको भन्दै सर्वोच्चमा रिट दायर गरेका हुन् । उनले राष्ट्रिय सभा सदस्यमा नियुक्तिका लागि मापदण्ड जारी गर्न परमादेश माग गरेका छन् ।
राष्ट्रपति भण्डारीले सरकारको सिफारिसमा गौतमलाई राष्ट्रियसभाको रिक्त एक पदमा नियुक्त गरेकी थिइन । पूर्व अर्थमन्त्री युवराज खतिवडाको कार्यकाल सकिएपछि ६ महिनादेखि सो पद रिक्त रहेको थियो ।
त्रिपाठीले प्रतिनिधि सभामा हारेकाहरूलाई राष्ट्रियसभामा लैजाने प्रवृत्ति बढेको जिकिर गरेका छन् ।
यससम्बन्धमा बुधबार पेशी तोकिने भएको छ ।
प्रतिक्रिया