काठमाडौंमा संक्रमित १ हजार नजिक, भीड बढ्दै जाँदा संक्रमित थपिँदै

काठमाडौं । काठमाडौं उपत्यकामा ९४७ जना नयाँ संक्रमित थपिएका छन् । यो अहिलेसम्मकै धेरै हो ।

स्वास्थ्य तथा जनसंख्या मन्त्रालयका प्रवक्ता प्राडा जागेश्वर गौतमले दिएको जानकारी अनुसार काठमाडौंमा मात्रै ७४७ जना संक्रमित थपिएका छन् । ललितपुरमा ११४ जना र भक्तपुरमा ७३ जना संक्रमित थपिएका छन् ।

देशभर थपिने कुल संक्रमित भन्दा काठमाडौंमा मात्रै थपिने संक्रमित निरन्तर ५० प्रतिशत भन्दा बढी थपिइरहेका छन् ।

उपत्यकामा भीडभाड बढ्दै जाँदा संक्रमितहरु पनि बढ्ने क्रम अत्याधिक बढेर गएको छ ।

सरकारले भीड नियन्त्रण गर्न नसक्ने अवस्था आइसकेको छ ।

सवारी साधनमा जोर विजोर प्रणाली नाम मात्रको देखिएको छ । जसका कारण आम मानिस जथाभावी असुरक्षित हिँड्ने बानीका कारण पनि रोग फैलिन मद्दत पुगेको छ।