कोरोना संक्रमित सशस्त्र प्रहरी इन्स्पेक्टर बुढाथोकीको मृत्यु

काठमाडौं । कोरोना भाइरसको संक्रमणबाट सशस्त्र प्रहरीका एक जना इन्स्पेक्टरको मृत्यु भएको छ ।

कोरोना संक्रमण भएका सशस्त्र प्रहरी निरीक्षक (इन्स्पेक्टर) नविन बुढाथोकीको सोमबार राति मृत्यु भएको हो ।

बुढाथोकीलाई गत महिना २७ गते कोरोना संक्रमण पुष्टि भएको थियो । त्यसपछि उनलाई विराट मेडिकल कलेजमा भर्ना गरिएको थियो । तर भेन्टिलेटरमा राखेर उपचार गरेकै अवस्थामा सोमबार राति सवा ११ बजे उनको मृत्यु भएको हो ।

बुढाथोकी २०६८ सालबाट सशस्त्र प्रहरीमाको सेवामा प्रवेश गरेका थिए । तेह्रथुमको म्याग्लुङ नगरपालिका–१ घर भएका बुढाथोकीको हाल सशस्त्र प्रहरी ३ नम्बर गण मोरङमा उनको दरबन्दी थियो ।

बुढाथोकीसँगै सशस्त्र प्रहरीका ३ जना कर्मचारीको कोरोना संक्रमणका कारण मृत्यु भएको छ ।