उखु किसानको आन्दोलन जारी, भुक्तानी नपाएसम्म घर नफर्किने

काठमाडौं । आन्दोलनरत उखु किसानहरुले उखुको भुक्तानी नपाएसम्म घर नफर्किने स्पष्ट पारेका छन् ।

सरकारले वार्ताका लागि बोलाएको पत्रको जवाफ दिँदै किसानहरुले भुक्तानी नपाएसम्म आफ्नो आन्दोलनलाई जारी राख्ने बताएका छन् ।

उनीहरुले सरकारी कोषबाट आफ्नो रकम भुक्तानी गरिदिने या उद्योगीहरुबाट रकम असुल गराइदिनुपर्ने दुई बुँदे शर्त अघि सारेका छन् ।

सरकारी कोषबाट आफुहरुको बाँकी बक्यौता भुक्तानी गरी सरकारले उद्योगीहरुबाट व्याजसहित त्यसबापतको रकम असुल्न आग्रह गरेका छन् ।

किसान संघर्ष समितिका अध्यक्ष रामस्वार्थ रायले सरकारलाई पठाएको पत्रमा उखुको मूल्य भुक्तानी नपाएसम्म आफुहरुको शान्तिपूर्ण आन्दोलन जारी राख्ने उल्लेख गरिएको छ । किसानहरु वार्ताको विरोधी नभएको जिकिर गर्दैै पत्रमा परिणाममुखी वार्ता गर्न चाहेको जनाइएको छ ।

विगत केही दिनदेखि उखु किसानहरु उद्योगीहरुबाट बक्यौता भुक्तानीको माग गर्दै माइतीघर मण्डलामा आन्दोलनमा रहेका छन् ।