भारतीय प्रधानमन्त्री नरेन्द्र मोदीको गृहराज्य गुजरातमा फुटपाथमा सुतेका बेघर मजदुरमाथि ट्रकले कुल्चिँदा १३ जनाको मृत्यु भएको छ ।

सोमबार राति कोसाम्बा क्षेत्रस्थित किम–मान्डवी रोडको पालोडगाम नजिक फुटपाथमा सुतेका मजदुरमाथि ट्रक कुल्चिँदै अघि बढेको थियो । दुर्घटनामा १२ जनाको घटनास्थलमै र अन्य एकको उपचारको क्रममा मृत्यु भएको थियो । अन्य सात जना घाइतको उपचार भैरहेको भारतीय सञ्चारमाध्यमहरुले जनाएका छन् ।

उखु बोकेको ट्याक्टरसँग ठोक्किएपछि चालकले सन्तुलन गुमाउँदा ट्रक फुटपाथमा गुडेको स्थानीय प्रहरीले जनाएको छ । मृतक सबै मजदुर राजस्थानको बान्सावाडा जिल्लास्थित कुशलगढका थिए। घाईतेहरुलाई उपचारका लागि स्थानीय अस्पताल भर्ना गरिएको छ भने मृतकको पोष्टमार्टम प्रक्रिया अगाडी बढाईएको छ । मध्यराती १२ बजे भएको घटनामा अनियन्त्रित रफ्तारमा आएको ट्रक फुटपाथमा सुतिरहेका १८ जना मजदुर माथि गुडेको थियो ।

घटनामा परि ६ महिनाको बालिकाको ज्यान बचेपनि उनका आमा बाबुको भने मृत्यु भएको प्रहरीले जनाएको छ ।