काठमाडौं । प्रचण्ड–नेपाल नेतृत्वको नेपाल कम्युनिष्ट पार्टी नेकपाले आयोजना गर्न लागेको बृहत प्रदर्शनका कारण राजधानी काठमाडौंको ट्राफिक व्यवस्था अस्तव्यस्त भएको छ ।
प्रधानमन्त्री केपी शर्मा ओलीले प्रतिनिधिसभा विघटन गरेको विरोधमा नेकपाले आज काठमाडौंमा शक्ति प्रदर्शन गर्न लागेको हो ।
प्रदर्शनमा सहभागी हुन विभिन्न स्थानबाट जुलुस जम्मा हुन थालेलगत्तै ट्राफिक व्यवस्था बिथोलिएको हो । ट्राफिक प्रहरीले जुलुस निस्किने र हिँड्ने बाटोलाई छोडेर बैकल्पिक बाटो प्रयोग गर्न सडकप्रयोगकर्ताहरुलाई सुझाव दिएको छ ।
जुलुस निस्कनु अघि नै ट्राफिकले रिङरोडभित्र ठूला यातायातका साधनलाई प्रवेशमा रोक लगाइसकेको छ । ट्राफिक व्यवस्था अस्तव्यस्त भएपछि काम बिशेषले निस्किएका सर्वसाधारण र कर्मचारीहरु भने अलपत्र परेका छन् ।
नेकपाले राजधानीका ९ स्थानबाट जुलुस प्रदर्शन गर्दैछ । नेकपाका स्थायी कमिटी सदस्यसहितका नेताहरुको अगुवाईमा लैनचौर, त्रिचन्द्र कलेज, डिल्लीबजार, माइतीघर, त्रिपुरेश्वर, कुपण्डोल, प्रदर्शनीमार्ग, शान्तिवाटिका र बाल्मिकी क्याम्पसबाट जुलुस निस्किँदैछ ।
सबै जुलुस रत्नपार्कमा पुगेपछि केन्द्रिकृत रुपमा भृकुटी मण्डपमा पुगेर आमसभामा परिणत हुँदैछ । आमसभालाई अध्यक्षद्वय पुष्पकमल दाहाल प्रचण्ड, माधवकुमार नेपाल लगायतका शिर्ष नेताहरुले सम्बोधन गर्ने कार्यक्रम रहेको छ ।
आजको शक्ति प्रदर्शनलाई प्रभावकारी बनाउन नेकपाले काठमाडौं ललितपुर भक्तपर र आसपासका छिमेकी जिल्लाहरुबाट कार्यकर्ता ओसारेको छ । यसअघि नेकपाले गत पुष १४ गते प्रदर्शन गरेको थियो ।
प्रतिक्रिया