हिमालय एयरलाइन्स र यती एयरलाइन्सले एक आपसमा सहकार्य गर्ने

काठमाडौं । हिमालय एयरलाइन्स र यती एयरलाइन्सले एक आपसमा व्यापार साझेदारी गर्ने भएका छन ।

दुई कम्पनीले सञ्जाल एकीकरण, बिक्री वृद्धि र दुवै कम्पनीको इ-कमर्स काम क्षमतामा क्रमिक विस्तारको लागि एक आपसमा रणनीतिक साझेदार गर्ने भएका हुन ।

एप्लिकेशन प्रोगामिङ्ग ईन्टरफेस (एपीआई)को प्रभावकारी कार्यान्वयनका लागि पहिलो सम्झौतामा कम्पनीका प्रतिनिधिहरूले आज हस्ताक्षर गरेका हुन । हिमालय एयरलाइन्सले हाल मध्य पूर्वी एशिया र दक्षिण एशियाका विभिन्न गन्तव्यहरूमा अन्तर्राष्ट्रिय उडानहरू सञ्चालन गरिरहेको छ । यस्तै, यती एयरलाइन्सले नेपालभर सञ्जाल बिस्तार गरी विभिन्न आन्तरिक गन्तव्यहरूमा नियमित उडान गर्दै आएको छ ।

सम्झौताअनुसार दुवै कम्पनीले आ-आफ्नो टिकटहरू जारी गर्न, नयाँ सेवाहरूलाई समावेश गर्न, यात्रुहरूलाई टिकट खरीदमा सरलीकृत बनाउन साझेदारी गर्नेछन । यद्यपि यसमा आवश्यक प्राविधिक प्रक्रियाहरू पूरा गर्न बाँकी रहेकोले कार्यान्वयनमा आउन केही समय लाग्ने कम्पनीहरूले बताएका छन ।

उक्त कार्यक्रममा बोल्दै हिमालय एयरलाइन्सका उपाध्यक्ष विजय श्रेष्ठले दुई कम्पनीबीच भएको सहमतिले व्यापारिक साझेदारीको दिशामा पहिलो चरण भएको बताए । यस्तै, यती एयरलाइन्सका प्रमुख कार्यकारी अधिकृत अनोज रिमालले हिमालय एयरलाइन्सलाई साझेदारको रूपमा पाउँदा उत्साति बनेको बताए