काठमाडौं । सर्वोच्च अदालतले प्रतिनिधिसभा विघटनलाई बदर गरेपछि विकासित राजनीतिक घटनाक्रमबारे राजनीतिक दलहरु आन्तरिक र अन्तरपार्टी छलफल सुरु गरेका छन् ।
प्रचण्ड नेपाल पक्षीय नेपाल कम्युनिष्ट पार्टी नेकपाका अध्यक्षद्वय पुष्पकमल दाहाल प्रचण्ड र माधवकुमार नेपालले नेपाली काँग्रेसका सभापति शेबहादुर देउवासँग भेट गर्ने भएका हुन् । चितवनबाट फर्किएका अध्यक्षद्वय प्रचण्ड र नेपालले देउवासँग छलफल गर्न लागेका हुन् ।
अबको संसदीय जोड घटाउमा मालदार पोजिसनमा रहेको नेपाली काँग्रेसका सभापति देउवासँग अब कसरी अघि बढ्ने भन्ने विषयमा छलफल गर्न अध्यक्षद्वय प्रचण्ड र नेपाल देउवा निवास जान लागेका हुन् ।
प्रचण्ड नेपाल नेकपासँग संसदमा एकल सरकार बनाउन सक्ने सांसद संख्या छैन । त्यसैले नेकपाले काँग्रेस र जनता समाजवादी पार्टीसँगको छलफललाई सघन बनाउन खोजेको हो ।
सर्वोच्च अदालतको फैसला अघिसम्म चुनावका लागि मरिहत्ते गरेका देउवालाई यस अघि नै प्रचण्डले प्रधानमन्त्रीको अफर गरिसकेका थिए । काँग्रेस पार्टी र अधिकांश नेताले प्रतिनिधिसभा विघटन असंवैधानिक र अलोकतान्त्रिक भएको निस्कर्ष निकाल्दै सरकार विरुद्ध आन्दोलनमा केन्द्रित हुनुपर्ने बताइरहँदा देउवाले सर्वोच्च अदालत देखाउँदै चुनावकै विषयलाई केन्द्रमा राखेका थिए ।
नेकपाले आफ्नो पक्षबाट प्रधानमन्त्री बनाउन सकेन भने देउवालाई प्रधानमन्त्रीमा समर्थन गर्नसक्ने आंकलन गरिएको छ । यद्यपी, कानुनी रुपमा नेकपाको विभाजन नभैसकेको अवस्थामा नेकपा संसदीय दलभित्रको समिकरणसमेत महत्वपूर्ण हुने मानिएको छ ।
प्रतिक्रिया