काठमाडौं । नेकपा माओवादी केन्द्र र जनता समाजवादी पार्टी जसपाबीच सत्ता साझेदारीका विषयमा छलफल भएको छ ।
माओवादी केन्द्रको पार्टी कार्यालय पेरिसडाँडामा भएको छलफलमा माओवादीले ओली सरकार विस्थापित गर्न सहकार्यको प्रस्ताव अघि सारेको छ । माओवादीले अग्रगमनका पक्षधर शक्तिहरुबीच आगामी चुनावसम्मै कार्यगत एकताको प्रस्ताव समेत गरेको छ ।
बैठकमा माओवादी केन्द्रले चुनावलाई समेत केन्द्रमा राखेर सत्ता साझेदारी गर्न आग्रह गरेको थियो । असंवैधानिक ढंगले संसद विघटन गर्ने र देशलाई अराजकतामा लैजाने ओली सरकारलाई विस्थापन गर्नुपर्ने विषयमा छलफल भएको छ । जसपाका नेताहरुले भने आफुले उठाउँदै माग सम्बोधन कसरी गर्न सकिन्छ भनेर जिज्ञासा राखेका छन् ।
बैठकपछि जसपा अध्यक्ष महन्थ ठाकुरले छलफल सकारात्मक रहेको प्रतिक्रिया दिए । तर, अहिले नै कुनै निस्कर्षमा नपुगेको पनि उनले बताए । अध्यक्ष ठाकुरले माओवादी केन्द्रसँग फेरि छलफलमा बस्ने गरी आजको छलफल सकिएको बताए ।
बैठकमा माओवादी केन्द्रबाट अध्यक्ष प्रचण्ड नेता नारायणकाजी श्रेष्ठ, जनार्दन शर्मा, देव गुरुङ लगायतका नेताहरु सहभागी थिए । यसैगरी जसपाको तर्फबाट अध्यक्षद्वय ठाकुर र उपेन्द्र यादव, संघीय परिषद् अध्यक्ष डा बाबुराम भट्टराई, नेताहरु अशोक राई र राजेन्द्र महतो सहभागी थिए।
जसपाले यसअघि शुक्रबार नेपाली कांग्रेसँग छलफल गरेको थियो ।
प्रतिक्रिया