काठमाडौं । दुई दिने भ्रमणको सिलसिलामा राष्ट्रपति विद्यादेवी भण्डारी बंगलादेशको ढाका पुगेकी छिन् ।
राष्ट्रपति भण्डारी आज बिहान ५४ सदस्यीय भ्रमण दलको नेतृत्व गर्दै बंगलादेश गएकी हुन् ।
भण्डारीलाई त्रिभुवन अन्तराष्ट्रिय विमानस्थलमा उपराष्ट्रपति नन्दबहादुर पुन, प्रधानमन्त्री केपी शर्मा ओली, सभामुख अग्निप्रसाद सापकोटा लगायतका विशिष्ठ अतिथिहरुले विदाई गरेको थिए । नेपाल एयरलाइन्सको चार्टर विमान चढेर भण्डारी ढाका पुगेकी हुन् ।
राष्ट्रपति भण्डारीलाई बंगलादेशी सेनाले २१ तोपको सलामीसहित ‘गार्ड अफ अनर’ ले सम्मान गर्नेछ । उनले राष्ट्रिय शहीदप्रति श्रद्धाञ्जली अर्पण गर्नेछिन् ।
ढाकामा भण्डारी बंगलादेश स्वतन्त्र भएको ५० वर्ष तथा राष्ट्रपिता शेख मुजिबुर रहमानको जन्म शताब्दीको अवसरमा आयोजित विशेष समारोहमा सहभागी हुनेछिन् । भण्डारीले बंगलादेशी समकक्षीसँग दुईपक्षीय भेटवार्ता गर्नेछिन् ।
यस्तै, प्रधानमन्त्री शेख हसिनालगायतसँग शिष्टाचार भेट गर्ने कार्यक्रम रहेको छ । ढाकास्थित नेपाली दूतावासको भ्रमण गरी नेपाली समुदायसँग पनि भेट गर्ने कार्यक्रम समेत रहेको छ ।
प्रतिक्रिया