पाकिस्तानलाई समृद्ध तुल्याउन जोड

काठमाडौं । पाकिस्तानको राष्ट्रिय दिवसका अवसरमा नेपालस्थित पाकिस्तानी राजदूतवासद्वारा आफ्नो देशको राष्ट्रिय झण्डा फहराइएको छ ।

आफ्नो राष्ट्रको झण्डोत्तोलन गर्दै यहाँस्थित पाकिस्तानी राजदूत सयद हैदर शाहले आफ्ना पूर्वजले परिकल्पना गरेको पाकिस्तान निर्माण गर्न सबै पाकिस्तानीले आफ्नो प्रतिबद्धताको पुनर्पुष्टि गर्नुपर्नेमा जोड दिए ।

कार्यक्रममा पाकिस्तानका राष्ट्रपति अरिफ अल्भी र प्रधानमन्त्री इमरान खानले राष्ट्रिय दिवसका अवसरमा जारी गरेको सन्देश वाचन गरिएको थियो ।

सन्देशमा उनीहरुले पाकिस्तानलाई आर्थिकरुपमा सशक्त एवं समृद्ध तुल्याउन पाकिस्तानीको दृढ प्रतिबद्धता अपरिहार्य भएको जनाएका छन् ।

सन् १९४० मार्च २३ तारिखका दिन लाहोरमा पाकिस्तान रिजलुसन पारित भएको थियो । मोहम्मद अलि जिन्हाको नेतृत्वमा भएको रिजलुसनले स्वतन्त्र पाकिस्तान निर्माणका लागि कोशेढुंगा सावित भएको थियो । जिन्हा पाकिस्तानका पिता हुन् ।