पोखरा । गण्डकी प्रदेश सरकारबाट नेकपा माओवादी केन्द्र बाहिरिएको छ ।
प्रदेश सरकारमा सहभागी माओवादी केन्द्रका दुई मन्त्रीले बुधबार राजीनामा दिएका छन् । आन्तरिक मामिला तथा कानूनमन्त्री हरिबहादुर चुमान र भूमिव्यवस्था, कृषि तथा सहकारीमन्त्री लेखबहादुर थापाले मुख्यमन्त्री पृथ्वीसुब्बा गुरुङलाई आफ्नो राजीनामा बुझाएकाछन्।
बुधबार बिहान बसेको माओवादी संसदीय दलको बैठकले मन्त्रीद्वय चुमान र थापालाई मन्त्रीपदबाट राजीनामा दिन निर्देशन दिएको थियो ।
बुधबारबाटै सुरु भएको प्रदेशसभाको हिउँदे अधिवेशनलाई सम्बोधन गर्दै मन्त्री चुमानले आफुहरुले मुख्यमन्त्रीलाई राजीनामा बुझाएको जानकारी दिएका थिए । सम्बोधनका क्रममा चुमानले केन्द्रमा देखा परेको राजनीतिक अस्थिरताले प्रदेशलाई पनि प्रभावित बनाएको बताएका थिए ।
माओवादी केन्द्रले एमालेका पृथ्वीसुब्बा गुरुङलाई समथर्न गरेसँगै उनीहरु २०७४ फागुन ४ देखि मन्त्री रहँदै आएका थिए । पार्टी एकताको स्प्रिटसहित एउटै चुनावी घोषणापत्र लिएर चुनाव लडेका एमाले र माओवादीबीच मुख्यमन्त्री र सभामुख पद बाँडफाँड गरिएको थियो ।
गण्डकी प्रदेशसभामा ६० सदस्य रहेका छन् । जसमध्ये एमालेका २८, कांग्रेसका १५, माओवादीका १२, राष्ट्रिय जनमोर्चाका ३ र जनता समाजवादी पार्टीका दुई जना सांसदहरु रहेका छन् ।
माओवादी केन्द्रले सरकारबाट बाहिरिने निर्णय गरेपनि समर्थन भने तत्काल फिर्ता नलिने बताएको छ ।
प्रतिक्रिया