रसुवा । रसुवाको कालिका गाउँपालिका-२, स्याउबारीमा टिप्पर दुर्घटना हुँदा २ जनाको मृत्यु भएको छ । एक जना बेपत्ता भएका छन् ।
दुर्घटनामा परि कालिका गाउँपालिका-१ राम्चेका २५ वर्षीय सागर तामाङ र उनका दाजु २७ वर्षीय राजेन्द्र तामाङको मृत्यु भएको छ ।
राति ११ बजेतिर राम्चेबाट बेत्रावती जाने क्रममा बागमती प्रदेश ०१-००६ ख १६८८ नम्बरको टिप्पर दुर्घटना भएको हो । सागर सवारी चालक हुन भने उनका दाजु ग्राङ प्राविका प्रधानाध्यापक हुन् ।
जिल्ला प्रहरी कार्यालय रसुवाका प्रहरी नायव उपरीक्षक देवेन्द्र पाण्डेका अनुसार टिप्परमा कालिका गाउँपालिका-१ का वडाध्यक्ष मालफूर्पा तामाङ सहित तीन जना रहेका थिए ।
दुर्घटना भएपछि दुई जनालाई रसुवा अस्पताल ल्याइएको थियो । उनीहरूको उपचारको क्रममा मृत्यु भएको छ । वडाध्यक्ष तामाङको मोबाइल गाडीमा भेटिएपनि उनको खोजी कार्य भइरहेको प्रहरी नायव उपरीक्षक पाण्डेले बताए ।
प्रतिक्रिया