खजुरा । प्रदेश सरकारले बाँकेको खजुरामा लुम्बिनी प्राविधिक विश्वविद्यालय स्थापना गर्ने निर्णय गरेको झण्डै ५ वर्ष पुग्नै लाग्दा विश्वविद्यालयले केन्द्रीय कार्यालय संचालनका लागि भवन प्राप्त गरेको छ । बाँकेको खजुरामा खजुरा गाँउपालिकाले अलिेसम्म संचालन गर्दै आएको पालिकाको जग्गा सहितको भवन विश्वविद्यालयलाई हस्तान्तरण गरेको छ ।
आज एक कार्यक्रमका बीच खजुरा गाँउपालिकाले लुम्बिनी प्राविधिक विश्वविद्यालयलाई १० कट्ठा जग्गा सहितको भवन हन्तान्तरण गरेको छ । पालिकाका अध्यक्ष डम्बर विकले विश्वविद्यालयका उपकुलपति प्रा. डा. विनोद ढकाललाई जग्गा र भवनको कागजात हस्तान्तरण गरे ।
भवन हस्तान्तरण कार्यक्रममा बोल्दै उपकुलपति ढकालले छिट्टै खजुराबाट विश्वविद्यालयको कक्षहरु समेत संचालन हुने विश्वास व्यक्त गरे । उनले विश्वविद्यालयका लागि ५० बिगाहा जग्गा प्राप्तीको प्रक्रिया अगाडि बढेको जानकारी दिँदै जग्गा प्राप्तीसँगै खजुरामा विश्वविद्यालयको भौतिक निर्माण सुरु हुने बताए । केन्द्रीय प्रशासनिक कार्यालय संचालनका लागि भवन उपलब्ध गराएकोमा उनले खजुरा गाँउपालिकालाई धन्यवाद व्यक्त गरे ।
पालिका अध्यक्ष विकले खजुरामा शिक्षा मैत्री वातावरण रहेको उल्लेख गर्दै विश्वविद्यालयले दक्ष जनशक्ति उत्पादन गरेर देशको समृद्धिमा योगदान गर्ने विश्वास व्यक्त गरे । उनले खजुरामा रहेका क्यान्सर अस्पताल, कृषि क्याम्पसलगायतका संस्थाहरुलाई खजुराबासीले मैत्रिपूर्ण अपनत्व दिन सकेको बताउँदै विश्वविद्यालयले पनि खजुराबासीको माया पाउने बताए ।
आब २०७६/२०७७ को नीति तथा कार्यक्रम मार्फत खजुरामा स्थापना गर्ने गरि प्रदेश सरकारले विश्वविद्यालय स्थापना गर्ने निर्णय गरेको थियो । विश्वविद्यालयलाई व्यवस्थित रूपमा संचालन गर्न २०७८ साल असार ०८ गतेको प्रदेश राजपत्र मार्फत प्रदेश विश्वविद्यालयको स्थापना, संचालन, नियमन र व्यस्थापन गर्न ऐन प्रकाशित गर्दै ‘विश्वविद्यालय ऐन, २०७८’ जारी गरेको थियो । विश्वविद्यालय ऐन, २०७८ को दफा ४७ ले दिएको अधिकारको प्रयोग गर्दै विश्वविद्यालय नियमावली २०७८ पनि जारी भई हाल नेपालगन्जमा अस्थायी मुकाम बनाएर विश्वविद्यालय संचालन हुँदै आएको छ ।
विश्वविद्यालयमा हाल प्राविधिक तर्फ ४ वटा, सूचना प्रविधि तर्फ २ वटा र इन्जिनियरिङ तर्फ २ वटा कक्षा संचालनमा रहेका छन् । झण्डै डेढवर्ष अघि खजुरामा केन्द्रीय कार्यालयको बोर्ड टाँगिएपनि पालिका भवन आफ्नो नयाँ भवनमा सर्न नसक्दा विश्वविद्यालयको केन्द्रीय कार्यालय संचालन हुन सकेको थिएन । भवनको आवश्यक मरमत पछि लगत्तै केन्द्रीय कार्यालय खजुराबाट संचालन हुने विश्वविद्यालयका रजिष्ट्रार रेगबहादुर भण्डारीले बताए ।
विश्वबिद्यालयका लागि अन्तमा ठहर भएको ९४ बिगाहा जग्गाको भोगाधिकार दिन पालिकाको सिफारिस सहित मन्त्रिपरिषदमा फायल पुगेपनि त्यसलाई घटाएर ५० बिगाहामा झारिएको र सो सम्बन्धमा संघीय सरकारको मन्त्रिपरिषदले निर्णय नगरिदिँदा विश्वविद्यालयका लागि प्रदेश सरकारले विनियोजन गरेको बजेट हरेकवर्ष फ्रीज हुने गरेको छ ।
प्रतिक्रिया