पोखरा । अविश्वासको प्रस्तावमार्फत आफ्नो सत्ता ढल्ने निश्चित भएपछि गण्डकी प्रदेशसभा बैठकलाई सत्तारुढ एमालेका सांसदले अवरुद्ध गरेका छन् ।
एमालेका सांसदहरुले कोरोना परीक्षण नगरी बैठक बसालेको भन्दै प्रदेशसभा बैठक अवरुद्ध गरेकाहुन् । विशेष अधिवेशनमार्फत बोलाइएको बैठकमा मुख्यमन्त्री पृथ्वीसुब्बा गुरुङ विरुद्ध टेबल गरिएको अविश्वासको प्रस्तावमाथि सोमबारबाट छलफल भैरहेकोछ ।
सांसदहरुले पीसीआर परीक्षण नगरेको, कोरोनाको दोस्रो डोज नलगाएको र जिल्ला प्रशासन कार्यालयले लगाएको निषेधाज्ञाको अवधीमा बैठक चल्न नदिने एमालेका सांसदले तर्क गरेका छन् । यद्यपी, कोरोनाको नाम देखाएपनि आफ्नो सरकार ढल्ने निश्चित भएपछि एमालेले नौटंकी गरेर बैठक अवरुद्ध बनाएको प्रतिपक्षी दलहरुले आरोप लगाएका छन् ।
विशेष अधिवेशनको दोस्रो दिन पनि अविश्वासको प्रस्तावमाथि छलफल सुरु हुनैलाग्दा एमालेका सांसदहरुले उठेर विरोध गरेका थिए । त्यसपछि सभामुखले सांसद राजीव पहारीलाई बोल्न समय दिएका थिए । पहारीले पीसीआर परीक्षण नगरी संसद बैठक बस्न नसक्ने तर्क गर्दै बैठक अघि बढाए अवरुद्ध गर्ने चेतावनी दिए ।
तर, त्यसअघि बसेको कार्यव्यवस्था परामर्श समिति र सरकारका मन्त्रीहरुसमेतको उपस्थितिमा भएको सर्वदलीय बैठक बसेर आजको कार्यसूची तयार भएको थियो ।
सभामुखले विशेष अधिवेशन रोक्न नसक्ने बताएपछि पनि एमाले सांसदहरुले उठेर विरोध जनाइरहे । त्यसपछि सभामुखले बैठक १८ मिनेट स्थगित गरेका छन् ।
गण्डकी प्रदेशसभामा नेपाली कांग्रेसका संसदीय दलका नेता कृष्णचन्द्र नेपालीलाई मुख्यमन्त्रीमा प्रस्तावित गर्दै कांग्रेस, माओवादी केन्द्र र जनता समाजवादी पार्टीले मुख्यमन्त्री पृथ्वीसुब्बा गुरुङ विरुद्ध अविश्वासको प्रस्ताव दर्ता गरेका थिए ।
मुख्यमन्त्री गुरुङले आफुविरुद्ध अविश्वासको प्रस्ताव आउने थाहा पाएपछि रातारात चालु हिउँदे अधिवेशन अन्त्य गराएका थिए । तर, तत्कालै प्रतिपक्षी दलहरुले संविधानअनुसार संसदको विषेशष अधिवेशन आह्वानका लागि प्रदेश प्रमुखलाई निवेदन दिएका थिए । त्यसपछि प्रदेश प्रमुखले बैशाख १३ गतेका लागि विशेष अधिवेशन आह्वान गरेका थिए । विशेष अधिवेशनको पहिलो दिन हिजो मुख्यमन्त्री विरुद्ध प्रदेशसभा बैठकमा अविश्वासको प्रस्ताव टेवल भैसकेको छ । सो प्रस्तावमाथिको छलफल जारी छ ।
प्रतिक्रिया