काठमाडौं । राष्ट्रपति बिद्यादेबी भण्डारीले बहुमत सहित सरकार गठन गर्न ३ दिन अघि गरेको समयसीमा भित्र कसैले दाबी गर्न नआएको राष्ट्रिपति कार्यालयले जनाएको छ । बिहीबार साँझ नौ बजेको समय सीमाभित्र कुनै पनि दलले बहुमतको सरकारको लागि दाबी पेश नगरेको राष्ट्रपति कार्यालयले सुचना मार्फत जानकारी दिएको छ ।
राष्ट्रपति विद्यादेवी भण्डारीले नेपालको संविधानको धारा ७६ को उपधारा (२) बमोजिम प्रतिनिधि सभामा प्रतिनिधित्व गर्ने दुई वा दुईभन्दा बढी दलहरुको समर्थनमा बहुमत प्राप्त गर्न सक्ने प्रतिनिधि सभाका सदस्यलाई बिहीबार साँझ ९ बजेभित्र नेपालको प्रधानमन्त्री पदमा नियुक्ति गर्ने प्रयोजनका लागि आफ्नो दाबी पेश गर्न आह्वान गरेकी थिइन् ।
तर, विपक्षी गठबन्धनले बहुमत जुटाउन नसकेपछि समयावधिभित्र दाबी पेस गर्न सकेन । तीन दिनको यो अवधिमा कांग्रेस सभापति शेरबहादुर देउवा, माओवादी केन्द्रका अध्यक्ष प्रचण्ड र जसपाका उपेन्द्र यादव र डा. बाबुराम भट्टराईले घनिभुत प्रयास गर्दा पनि बहुमत प्रमाणित गर्न सकेनन् । आज साँझ सम्मपनि बहुमत पुग्ने अवस्था नभएपछि अन्ततः उनीहरु प्रधानमन्त्रीको दाबी गर्न नजाने निष्कर्षमा पुगेका थिए । अब ७६ (३) बमोजिम केपी ओलीले नै सबैभन्दा ठूलो हैसियतले सरकार गठन गर्ने ढोका खुलेको छ ।
प्रतिक्रिया