काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) वैकल्पिक विधिबाट सञ्चालन गर्ने व्यवस्थाका लागि शिक्षा मन्त्रालयसँग अनुमति मागेको छ ।
नयाँ भेरियन्टसहितको कोरोना महामारीको दोस्रो लहरले आइपरेको संकटका कारण स्थगित एसईई परीक्षा गर्न अझै पनि संक्रमण कम नभएको र विद्यार्थीलाई भौतिक रूपमा उपस्थित गराउन असम्भव देखिएकोले वैकल्पिक विधिबाट परीक्षा गर्नको लागि मन्त्रालयसँग अनुमति मागेको बोर्डका अध्यक्ष प्रा.डा. चन्द्रमणि पौडेलले जानकारी दिए । यसबारे मन्त्रालयले कसरी गर्ने भन्ने निर्णय दिएपछि प्रक्रिया अघि बढ्ने उनको भनाई छ ।
यस वर्षको एसईई परीक्षा जेठ १३ गतेदेखि हुने कार्यतालिका थियो । एसईईका लागि प्रश्नपत्र छपाइको काम यसअघि नै सकिसकेको थियो । ५ लाख १७ हजार विद्यार्थी एसईई परिक्षा दिने तयारीमा छन् । यस्तै, जेठ २६ गतेदेखि तोकिएको कक्षा १२ को परीक्षा पनि स्थगित भएको छ ।
प्रतिक्रिया