कर्णालीमा घट्दै कोरोना संक्रमित

कर्णाली । पछिल्लो समयमा कर्णालीमा कोरोना संक्रमण जित्नेको संख्या बढ्दै गएको छ । सोमबार मात्र कर्णाली प्रदेशमा ५ सय १२ कोरोना संक्रमित निको भएर घर फर्केका छन् ।

कर्णालीमा हालसम्म एक लाख १५ हजार ४ सय ३३ जनाको कोरोना सङ्क्रमण परीक्षणमा १७ हजार १ सय ५० अर्थात् १५ प्रतिशतमा संक्रमण देखिएको छ । संक्रमण देखिएको कूल सङ्ख्यामा ९५ प्रतिशतले कोरोना भाइरस जितेर घर फर्केको स्वास्थ्य सेवा निर्देशनालय कर्णाली प्रदेशका निमित्त निर्देशक डा।रविन खड्काले जानकारी दिए ।

“पछिल्लो २४ घण्टामा एक हजार १ सय १३ जनाको कोरोना परीक्षण गरिएकामा २ सय ६ जनामा सङ्क्रमण पुष्टि भएको छ”, निर्देशक डा।खड्काले भने, “कोरोना भाइरस संक्रमणबाट भने चार जनाले ज्यान गुमाएका छन् ।”

मृत्यु हुनेमा सुर्खेतका दुई, सल्यान र जुम्लाका एक/एक रहेको उनले बताए । उनका अनुसार कोरोना भाइरसबाट गम्भीर प्रकृतिका छ भेन्टिलेटरमा, ५३ आइसीयूमा, ३ सय ७० आइसोलेसन केन्द्रमा र पाँच हजार १ सय ७१ जना होमआइसोलेसनमा रहेका छन् ।

कर्णालीमा मृत्यु हुने संक्रमितको संख्या केही घटे पनि मर्ने क्रम नरोकिएकाले सोमबारसम्म २ सय ४७ जना व्यक्तिको कोरोना संक्रमणबाट मृत्यु भएको स्वास्थ्य सेवा निर्देशनालय कर्णाली प्रदेशले जनाएको छ ।