बुटवल । इलाका प्रहरी कार्यालय बुटवलले सञ्चालन गरेको ‘अपरेसन साइलेन्ट स्ट्रिट’ अभियानअन्तर्गत आइतबार १० वटा मोटरसाइकल नियन्त्रणमा लिइएको छ । राजमार्ग चौराहा, दिपनगर र सुख्खानगर क्षेत्रलाई केन्द्रित गरी सञ्चालन गरिएको उक्त अभियानमा विभिन्न नियम उल्लङ्घन गर्ने मोटरसाइकलहरू नियन्त्रणमा लिइएको हो ।
प्रहरीका अनुसार विशेषगरी चर्को आवाज निकाल्ने, सवारीको स्वरूप परिवर्तन गरिएका तथा मादक पदार्थ सेवन गरी सवारी चलाउने चालकहरूलाई लक्षित गर्दै अभियान सञ्चालन गरिएको हो ।
प्रहरी नायव उपरीक्षक निशान्त श्रीवास्तवले बजार क्षेत्रमा बढ्दो ध्वनि प्रदूषण र लापरवाहीपूर्ण सवारी सञ्चालनका कारण जनजीवन प्रभावित हुनुका साथै दुर्घटनाको जोखिम बढ्दै गएको बताए । उनले करिब दुई घण्टाको अवधिमै उल्लेखनीय संख्यामा मोटरसाइकल नियन्त्रणमा लिइएको जानकारी दिँदै सम्बन्धित धनीमाथि प्रचलित कानुनअनुसार कडा कारबाही गरिने स्पष्ट पारे ।
प्रहरीले यसअघि पनि बुटवल क्षेत्रमा यस्ता सवारीमाथि निगरानी तथा कारबाही अभियान सञ्चालन गर्दै आएको थियो । केही समय शान्त रहेको अवस्था पछिल्लो समय पुनः बिग्रन थालेपछि ‘अपरेसन साइलेन्ट स्ट्रिट’ अभियानलाई अझ प्रभावकारी बनाउँदै अन्य क्षेत्रमा समेत विस्तार गर्ने तयारी गरिएको प्रहरीले जनाएको छ ।
प्रतिक्रिया