कर्णाली सरकार विस्तार कांग्रेसको तर्फबाट मन्त्री बनेका बिसी र श्रेष्ठले लिए सपथ

खबर कुरा
२३ जेष्ठ २०७८, आईतवार

सुर्खेत । सत्ता छोडेको तीनवर्ष पछि नेपाली कांग्रेस पहिलो पटक सरकारमा सहभागी भएको छ । कर्णाली प्रदेश सरकारमा कांग्रेसको तर्फबाट दुई मन्त्री नियुक्त भएका छन् ।

नवनियुक्त मन्त्रीले आइतबार पद तथा गोपनीयताको सपथ लिएका छन् । यज्ञबहादुर बिसीले सामाजिक विकास मन्त्री र दिनबन्धु श्रेष्ठले जलस्रोत तथा उर्जा विकास मन्त्रीको जिम्मेवारी सम्हाल्ने गरी सपथ लिएका हुन् ।

मुख्यमन्त्री महेन्द्रबहादुर शाहीले नेतृत्व गरेको सरकार विरुद्ध एमालेले अविश्वासको प्रस्ताव ल्याएपछि गत वैशाख ३ गते कांग्रेसले शाहीलाई समर्थन गरेको थियो । त्यसपछि कांग्रेस सरकारमा सहभागी हुने भनिएपनि लामोसमयसम्म मन्त्रालय लगायतको विषयमा कुरा नमिल्दा कांग्रेसको सत्तारोहण ढिला भएको थियो । बिसी र श्रेष्ठलाई सरकारमा पठाउने निर्णय कांग्रेसले शुक्रबार गरेको थियो ।

यससँगै २०७४ फागुन ३ गतेपछि टुटेको कांग्रेसको सत्ताको डोरी पुनः जोडिएको हो । २०७४ फागुन ३ गतेसम्म कांग्रेस सभापति शेरबहादुर देउवाको नेतृत्वमा सरकार रहेको थियो ।

यसमा तपाइको मत

Your email address will not be published. Required fields are marked *


*