काठमाडौं । ट्यांकर चालकलाई कोरोना खोप लगाउने सहमति भएपछि पेट्रोलियम पदार्थको ढुवानीमा भएको अवरोध हटेको छ ।
ट्यांकर चालकहरुले कोरोना खोप लगाउन पाउनुपर्ने माग गर्दै आइतबारदेखि इन्धन ढुवानी नै ठप्प पारेका थिए ।
मंगलबार नेपाल आयल निगम र नेपाल पेट्रोलियम ट्यांकर चालक संघबीच वार्तामा चालकलाई भोलिदेखि नै खोप उपलब्ध गराउने सहमति भएको छ ।
सहमति अनुसार निगमले उपलब्ध गराएको पासका आधारमा बागमती प्रादेशिक डिपो कार्यालय थानकोटका ९०० जना ट्यांकर चालक र सहचालकलाई खोप लगाइनेछ । उनीहरुलाई बलम्बुस्थित एपीएफ अस्पतालमा खोप लगाइदिने सहमति भएको छ । यस्तै, अमलेखगन्जमा झण्डै १ हजार ४०० चालक सहचालकले खोप लगाउन पाउनेछन् ।
ट्यांकर चालक सहचालकहरुलाई कोरोना विरुद्धको खोपको व्यवस्था गरेर इन्धन ढुवानीको अवरोध हटाइएको नेपाल आयल निगमका कार्यकारी निर्देशक सुरेन्द्र कुमार पौडेलले बताएका छन् ।
प्रतिक्रिया