बुटवल । लुम्बिनी प्रदेशका प्रदेश प्रमुख अमिक शेरचनले संविधानविद र सरोकारवालाहरुसँग छलफल गरेर छिट्टै संवैधानिक कदम चाल्ने बताएका छन् । लुम्बिनी प्रदेशको वर्तमान प्रदेश सरकारका संसदमा अल्पमतमा परिसकेको भन्दै धारा १६८(२) अनुसार बहुमतको सरकार गठन गर्ने प्रस्ताव आह्वानका लागि विपक्षीहरुले पेश गरेको समावेदन बुझ्दै प्रदेश प्रमुख शेरचनले संविधान अनुसार बस्तुस्थितीलाई बुझेर संवैधानिक ब्यक्तिहरुको राय अनुसार छिट्टै संवैधानिक कदम चाल्ने बताएका हुन् ।
प्रदेशसभामा रहेका कुल ८० सदस्य मध्य ४१ जना सांसदहरुको हस्ताक्षर सहित बहुमतको सरकार गठनको प्रक्रिया शुरु गर्न माग गर्न प्रदेश प्रमुख कार्यालय पुगेका विपक्षी साँसदहरुलाई सम्बोधन गर्दै प्रमुख शेरचनले विपक्षीले दिएको निवेदनका सम्बन्धमा कानुनी परामर्श लिने जनाउँदै निवेदनमा लेखिएको बिषयमा प्रदेश सरकारको समेत राय लिएर अगाडि बढ्ने बताए । उनले दलहरुसंग समेत छलफल आवश्यक रहने जनाउँर्द उनले चाँडो भन्दा चाँडो निष्कर्ष सहित जानकारी गराईने बताए ।
शंकर पोखरेल नेतृत्वको सरकार गत बैशाख देखि नै अल्पमत रहेको दाबी गर्दै विपक्षीहरुले असंवैधानिक सरकारलाई हटाएर संवैधानिक बाटोबाट बहुमतको सरकार गठन गर्ने प्रक्रिया अगाडि बढाउन माग गरेका छन् । प्रदेश प्रमुखलाई समावेदन बुझाउँदै विपक्षीहरुको तर्फबाट काँग्रेस संसदीय दलका नेता बिरेन्द्र कनोडियाले असंवैधानिक पोखरेल नेतृत्वको सरकारले ३-४ महिनाको अवधि बिभिन्न जालझेल गरेर गुजारेको बताए । उनले धारा १६८ को (२) अनुसारको सरकार गठन गर्ने प्रक्रिया अगाडि बढाएर माओवादी केन्द्रका संसदीयदलका नेता कुल प्रसाद केसीलाई मुख्यमन्त्रीमा नियुक्त गर्न प्रदेश प्रमुख समक्ष आग्रह गरे ।
समावेदन बुझाउनु अघि कांग्रेस प्रमुख सचेतक फकरुद्दीन खानले समावेदन पत्र पढेर सुनाएका थिए ।
प्रतिक्रिया