‘द भ्वाइस अफ नेपाल सिजन ३’ को उपाधि किरण गजमेरले चुमे

काठमाडौं । नेपालको चर्चित गायन रियालिटी शो ‘द भ्वाइस अफ नेपाल’ सिजन ३ को उपाधि किरण गजमेरले जितेका छन् ।

शनिबार राति भएको ग्राण्ड फिनालेमा सर्वाधिक भोट प्राप्त गरेर किरण ‘द भ्वाइस अफ नेपाल’ सिजन ३ को च्याम्पियन घोषित भएका हुन् ।

कोच प्रमोद खरेलको टिमबाट अन्तिम चारमा पुगेका किरणले टिम दीप श्रेष्ठबाट दार्जलिङका आर्यन तामाङ, टिम राजु लामाबाट तारा श्रीष मगर र टिम तृष्णा गुरुङबाट अन्तिम चारमा पुगेकी ज्वाला राईलाई पछि पार्दै उपाधिमा कब्जा जमाएका हुन् ।

किरण अमेरिकामा बस्छन् । अमेरिकामा बस्दै आए पनि प्रतियोगिताका लागि नेपालमा आएका किरणले सिक्किमका रवि गहतराजलाई पछि पारेर उपाधिको अन्तिम होडमा पुगेका थिए ।

प्रतियोगिताको विजेताले नगद पुरस्कारका साथै वर्ल्ड टूरको पनि मौका पाउनेछ । यसअघि सिजन १ मा स्याङ्जाका सिडी विजय अधिकारी र सिजन २ मा झापाका राम लिम्बूले उपाधि जितेका थिए ।