बुटवल । जबर्जस्ती करणी उद्योगको अभियोगमा रुपन्देहीका एक गाँउ पालिकाका अध्यक्षलाई प्रहरीले पक्राउ गरेको छ । रुपन्देहीको सम्मरीमाई गाउँपालिकाका अध्यक्ष जितेन्द्रनाथ शुक्ल (बब्लु) लाई प्रहरीले जबर्जस्ती करणी उद्योगको अभियोगमा पक्राउ गरेको छ । सम्मरीमाई गाउँपालिका वडा नम्बर १ की एक महिलामाथि जवरजस्ती करणी उद्योग गरेको आरोपमा प्रहरीले शुक्ललाई नियन्त्रणमा लिएको जिल्ला प्रहरी कार्यालय रुपन्देहीले जनाएको छ ।
वडा नम्बर ६ असुरैनामा रहेको गाउँपालिका अध्यक्षको घरमै बोलाएर महिलालाई जवरजस्ती करणी उद्योग गरेको भन्दै पीडित पक्षले उजुरी दिएको आधारमा प्रहरीले उनलाई पक्राउ गरेको हो ।
जिल्ला प्रशासन कार्यालयमा पीडित पक्षले उजुरी दर्ता गराएका थिए । उजुरीको आधारमा गाउँपालिका अध्यक्ष शुक्ललाई अनुसन्धानका लागि नियन्त्रणमा लिएको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक सत्यनारायण थापाले बताए ।
चोरी सम्बन्धी कसुरमा प्रहरी हिरासतमा रहेका पीडितका श्रीमानलाई छुटाईदिने आश्वासन दिएर जवरजस्ती करणी उद्योग गरेको पीडित पक्षको आरोप छ ।
प्रहरीले घटनाको सम्बन्धमा अनुसन्धान भईरहेको जनाएको छ ।
प्रतिक्रिया