काठमाडौं । नेपाली राष्ट्रिय क्रिकेट टिमका मुख्य प्रशिक्षक डेव वाटमोरले राजीनामा दिएका छन ।
आईसिसी विश्वकप लिग २ अन्तर्गतको क्रिकोणात्मक सिरिजका लागि ओमानमा रहेका मुख्य प्रशिक्षक वाट्मोरले शुक्रबार क्यानलाई इमेल पठाउँदै राजीनामा दिएका हुन ।
प्रशिक्षक वाट्मोरले राजीनामा दिए पनि स्वीकृत नभएको क्यान अध्यक्ष चतुरबहादुर चन्दले जानकारी दिए । वाट्मोरले पारिवारिक कारण देखाउँदै ओमान भ्रमणपछि नेपाली टिम छोड्न चाहेको अध्यक्ष चन्दले बताए ।
‘उहाँले ओमान भ्रमणपछि टिम छाड्छु भन्नु भएको छ । तर, राजीनामा स्वीकृत भइसकेको छैन । यस विषयमा उहाँसँग पनि छलफल गर्छौं र निर्णयमा पुग्छौं,’ अध्यक्ष चन्दले भने ।
कोभिड महामारीको समयमा परिवारसँग समय बिताउन वाट्मोरले राजीनामा दिएको बताएका छन । उनको परिवार श्रीलंकामा छ । वाट्मोरले ओमान भ्रमणपछि उतैबाट श्रीलंका जान चाहेको अध्यक्ष चन्दले बताए ।
श्रीलंकालाई विश्वकप उपाधि दिलाएका प्रशिक्षक वाट्मोर ८ महिनाअघि मात्र खुलाप्रतिस्पर्धाबाट नेपाली टिमको मुख्य प्रशिक्षक बनेका थिए । उनको कार्यकाल अझै चार महिना बाँकी छ ।
प्रतिक्रिया