काठमाडौं । दार्चुलाको तुइन घटना र नेपाली आकाशमा भारतीय हेलिकोप्टरको अनधिकृत उडानको विरोधमा विद्यार्थीहरुले काठमाडौंमा भारतीय प्रधानमन्त्री नरेन्द्र मोदीको पुत्ला दहन गरेका छन् ।
शुक्रबार नेकपा एकीकृत समाजवादी निकट विद्यार्थी संगठन अनेरास्ववियूले काठमाडौंका आरआर क्याम्पसअगाडि मोदीको पुत्ला जलाएको हो ।
गत साउन १५ गते तुइनबाट महाकाली नदी तर्नेक्रममा दार्चुलाको व्यास गाउँपालिका २ का जयसिंह धामी नदीमा खसेर वेपत्ता भएका थिए । भारतीय एसएसबीले तुइन काटिदिएका कारण धामी नदीमा वेपत्ता भएका थिए ।
तुइन घटनाको छानविन गर्न गठिन समितिले पनि एसएसबीकै उपस्थितिमा तुइन काटिएको उल्लेख गरेको थियो । गृहमन्त्रालयले भारत सरकारसँग कुरा गर्न परराष्ट्र मन्त्रालयलाई पत्राचार गरिसकेको छ । तर, सरकारले अहिलेसम्म भारतसँग औपचारिक कुरा गरेकै छैन । गठबन्धनका सहयात्री दलहरुले गठनबन्धनको बैठकमा यसबारेमा सरकारको औपचारिक धारणा मागिसकेका छन् ।
यता तुइन घटनापछि भारतले दार्चुलाको नेपाली आकाशमाथि निरन्तर अनधिकृत रुपमा हेलिकोप्टर उडान गर्दैआएको छ । नेपाली सेनाको व्यारेकमाथिबाटै उडान गर्न थालेपछि दार्चुला प्रशासनले भारतसँग लिखित आपत्ति जनाएको छ । तर, भारतीय उडान भने रोकिएको छैन । जबकी वेपत्ता धामीको खोजी गर्न नेपालले महाकाली नदीमाथि ड्रोन उडान खोज्दा भारतले अवरोध गरेको थियो ।
प्रतिक्रिया