तिलोत्तमा । नेपाली कांग्रेसको १४ औं महाधिवेशनका लागि प्रतिनिधि छनोटको विषयलाई लिएर तिलोत्तमामा विवाद सिर्जना भएको छ ।
तिलोत्तमा-६ का क्षेत्रीय प्रतिनिधि आकांक्षी लक्ष्मण गौतमले आफूलाई नेतृत्वमा जान नदिन अन्तरघात भएको भन्दै असन्तुष्टि जनाएका छन् ।
पञ्चायती शैली र अलोकतान्त्रीक शैली अपनाई एक पक्षले दमन र प्रतिसोधको भावनामा रहेर आफूलाई क्षत्रीय प्रतिनिधि हुन नदिएको गौतमको आरोप छ ।
क्षेत्रीय प्रतिनिधिका लगि आफ्ना प्रस्तावक तथा समर्थकलाई धम्क्याउनुका साथै उम्मेद्वारीका लागि दिइएको फर्म समेत च्यात्ने काम भएको भन्दै उनले गुनासो गरे ।
सत्यतथ्य छानविन र नियमसँगत अघि बढ्नका लागि निर्वाचन समितिमा आफूले उजुरी दर्ता गरेको जानकारी गराए । बुधबार तिलोत्तमामा पत्रकार सम्मेलनको आयोजना गर्दै उनले आफ्ना असन्तुष्टि व्यक्त गरेका हुन् ।
तिलोत्तमा-६ बाट महाधिवेशनका लागि २६ जना प्रतिनिधि छनोट भएका छन् । ३१३ जना कांग्रेस क्रियाशिल सदस्य रहेको यस वडामा निर्वाचन नगरी सहमतीय प्रणालीबाट प्रतिनिधि छनोट गरिएको थियो ।
असन्तुष्ट रहेका गौतमले भने आफूलाई निषेध गर्नकै लागि चुनावी प्रक्रियामा नगई सहमतीको नाटक रचिएको उल्लेख गरे । कांग्रेसका बहुमत सदस्य आफ्नो पक्षमा रहेको दाबी गर्दै उनले चुनावमा जाँदा हार्ने डरले षड्यन्त्रमूलक ढंगले आफूलाई नै जानकारी नदिई सहमतीमा प्रतिनिधि छनोट बहाना बनाइएको उल्लेख गरे ।
प्रतिक्रिया