काठमाडौं । साफ च्याम्पियनसिप खेल्न नेपाली राष्ट्रिय फुटबल टोली माल्दिभ्स पुगेको छ । नेपाली टोली कतारमा दुई साता प्रशिक्षण गरेर सोमबार साँझ माल्दिभ्स पुगेको हो ।
असोज १५ गते नेपाल र मालदिभ्सबीच पहिलो खेल हुनेछ । साफ च्याम्पियनसिपका लागि प्रशिक्षक अब्दुल्लाह अलमुताइरीले शनिबार मात्र २३ सदस्यीय टिम घोषणा गरेका थिए ।
उनले कतार भ्रमणमा रहेका २५ खेलाडीबाट गोलकिपर विकेश कुथु र डिफेन्डर राजन गुरुङलाई बाहिर राख्दै टिम घोषणा गरेका थिए ।
१३ औं संस्करणको साफ च्याम्पियनसिप असोज १५ गतेदेखि माल्दिभ्सको राजधानी मालेमा आयोजना हुँदै छ । प्रतियोगिताको पहिलो दिन नै नेपालले आयोजक माल्दिभ्ससँग खेल्नेछ ।
नेपालले दोस्रो खेल श्रीलंकासँग असोज १८ गते खेल्नेछ । त्यस्तै, तेस्रो खेलमा भारतसँग असोज २४ र लिग चरणको अन्तिम खेलमा बंगलादेशसँग असोज २७ मा भिड्नेछ ।
कोरोनाका कारण पाकिस्तान र भुटान सहभागी नहुने भएपपछि यो पटक साफ च्याम्पियनसिपमा पाँच टोली मात्र छन् । सिंगल राउन्ड रोबिनका आधारमा खेल हुनेछ र शीर्ष दुई टिमबीच फाइनल खेल हुनेछ ।
साफ च्याम्पियन्सपका लागि नेपाली टोलीले तीन महिनाभन्दा बढी समयदेखि प्रशिक्षण गरिरहेको छ । साफ च्याम्पियनसिपकै तयारीका लागि नेपालले दशरथ रंगशालामा भारतसँग दुई मैत्रीपूर्ण खेल खेलेका थियो भने कतारमा आइतबार मात्र ओमानसँग मैत्रीपूर्ण खेल खेलेको थियो ।
प्रतिक्रिया