काठमाडौं । विधान बनाउन ६ हजार बढी प्रतिनिधि भेला गरेको नेकपा एमालेले नेतृत्व चयन गर्न भने १ हजार ५३६ जना मात्र कार्यकर्तालाई महाधिवेशनमा प्रतिनिधि बनाउने भएको छ । अघिल्लो महिना सम्पन्न भएको विधान महाधिवेशनमा ६ हजार बढी पार्टी सदस्यहरुलाई सहभागी बनाएको एमालेले नयाँ नेतृत्व निर्वाचित गर्ने समेत अभिभारा बोकेको दशों महाधिवेशनमा १ हजार ५३६ जना मात्र प्रतिनिधि सभागी गराउने निर्णय गरेको हो । बिहिबार बसेको एमाले स्थायी कमिटीको बैठकले महाधिवेशन प्रतिनिधिको संख्यालाई खुम्च्याएर १५३६ संख्यामा झारेको हो ।
बैठकले हरेक निर्वाचन क्षेत्रबाट १ हजार ५ सयजना पार्टी सदस्यबाट ३ जना प्रतिनिधि छनोैट गर्ने गरि निर्णय भएको बैठकपछि पार्टी प्रवक्ता प्रदिप ज्ञवालीले जानकारी दिए । ज्ञवालीका अनुसार भूगोल कमिटीहरूबाट कुल ११९६ जना प्रतिनिधि छानिने छन् भने बाँकी गैर भूगोलबाट ३४० जना गरी कुल १५३६ प्रतिनिधि छानिने छन् । महाधिवेशनमा ५१ प्रतिशत समावेशी बाट तथा ४९ प्रतिशत खुल्लाबाट प्रतिनिधित्व गर्ने व्यवस्था गरिएको । विधानतः महिलाको प्रतिनिधित्व अनिवार्य गरिनुपर्ने निर्णय भएको समेत ज्ञवालीले जानकारी दिए ।
आज बसेको स्थायी कमिटीको बैठकको निर्णयलाई १० बुँदे सहमतिका आधारमा एमालेमा बसेका तेस्रो धारका नेताहरुले भने असन्तुष्टि जनाएका छन् । विधान बनाउन ६ हजार पार्टी सदस्य चाहिने अनी नेतृत्व छान्न १५०० भए पुग्ने ? बैबठकबाट निस्केने क्रममा तेस्रो धारका एक नेताले गुनासो गरे । बैठकमा कोरोनाका कारण अनुपस्थित रहेका उपमहासचिव घनश्याम भुसालले लिखित पत्र पठाउँदै पार्टीभित्र १० बुँदे सहमति लागू नगरेका कारण एमालेको डीएनएमाथि नै आक्रमण हुने स्थिति आएको जनाएका थिए । उनले अध्यक्ष केपी ओलीलाई सम्बोधन गर्दै दश बुँदे जे भनेर गरिएको थियो, त्यसैगरी लागू गर्न माग समेत गरेका छन् ।
बिहीबार बैठकमा चितवनमा हुने महाधिवेशनको व्यवस्थापकीय तयारीबारे नेता सुरेन्द्र पाण्डेले रिपोर्टिङ गरेका थिए । आगामी मंसिर १० देखि १२ गतेसम्म हुने महाधिवेशन नारायणी किनारमा उद्घाटन गर्ने र सौराहामा समापन गर्ने पाण्डेले जानकारी गराएका थिए ।
प्रतिक्रिया