मध्यरातमा बोहोराटार पुगेर देउवाले भेटे रामचन्द्र पौडेललाई

काठमाडौं । नेपाली कांग्रेसका सभापति शेरबहादुर देउवाले पार्टीका वरिष्ठ नेता रामचन्द्र पौडेलसँग भेट गरेका छन् ।

१४औं महाधिवेशनमा पुनः सभापतिको उम्मेदवार बनेका देउवाले गएराति ९ बजेतिर पौडेल निवास बोहोराटार पुगेर पौडेललाई भेट गरेका हुन् । पौडेललाई सभापति शेरबहादुर देउवाले भेटेर सहयोग मागेका छन् ।

‘सवा ९ बजेतिर उहाँ (देउवा) आउनु भएको थियो । ४५ मिनेटजति भेट भयो’, पौडेलका स्वकीय सचिव चिरञ्जिवी अधिकारीले भने, ‘राष्ट्रलाई तपार्इंको अझै खाँचो छ । स्वास्थ्यको ख्याल गर्नुहोला र महाधिवेशनमा मलाई सहयोग गर्नुहोस् ।’

अधिकारीका अनुसार नेपाली कांग्रेसको विगत, वर्तमान र भविष्यको बारेमा छलफल गर्दै देउवाले परिवारिक कुराकानीसमेत गरेका थिए ।

१४औं महाधिवेशनमा सभापतिको उम्मेदवार बन्न चाहेका पौडेल आफ्नै समुहमा फुट आएपछि विज्ञप्ति जारी गरी चुनावी प्रतिस्पर्धाबाट बाहिरिएका थिए । तर, पौडेलले राजनीतिबाट भने नबाहिरिने बताइसकेका छन् ।

कांग्रेसको आफ्नो सिद्धान्त, आदर्शभन्दा विपरीत अस्वस्थ प्रतिष्पर्धा हुने देखेर महाधिवेशनमा सभापतिको दौडबाट आफू बाहिरिएको पौडेलले बताएका थिए ।