काठमाडौं । नेपाल प्रिमियर लिग (एनपीएल) को तेस्रो संस्करणले अन्तर्राष्ट्रिय क्रिकेट परिषद् (आईसीसी) बाट आधिकारिक टी–२० मान्यता पाएको छ । नेपाल क्रिकेट संघ (क्यान) ले शुक्रबार प्रेस विज्ञप्ति जारी गर्दै प्रतियोगिताले आईसीसीको मान्यता प्राप्त गरेको जानकारी दिएको हो ।

प्रतियोगिता सञ्चालन हुन १० दिन बाँकी रहँदा प्राप्त मान्यताले नेपाली घरेलु क्रिकेटको अन्तर्राष्ट्रिय पहिचान थप बलियो बनाउने अपेक्षा गरिएको छ ।

आईसीसीको मान्यता प्राप्त भएसँगै एनपीएलका फ्रेन्चाइज टोलीहरूले विदेशी खेलाडी अनुबन्ध गर्न पाउने विषयमा यसअघि रहेको सीमा हटेको छ । यसअघि आईसीसीले एनपीएलको एक संस्करणमा टेस्ट राष्ट्रका बढीमा चार खेलाडी मात्र अनुबन्ध गर्न सकिने अनुमति दिएको थियो । अब भने फ्रेन्चाइज टोलीहरूले विदेशी खेलाडी अनुबन्ध गर्दा संख्यात्मक सीमा व्यहोर्नुपर्ने छैन ।

क्यानले आईसीसीको मान्यताले नेपाली क्रिकेटको विकास र विस्तारसँगै अन्तर्राष्ट्रिय स्तरमा नेपालको घरेलु क्रिकेट प्रतियोगिताको पहिचान मजबुत बनाउन महत्वपूर्ण योगदान पुग्ने विश्वास व्यक्त गरेको छ ।

एनपीएल नेपालको फ्रेन्चाइज क्रिकेट प्रतियोगिता हो । तेस्रो संस्करणले अन्तर्राष्ट्रिय मान्यता पाएसँगै प्रतियोगिताको प्रतिस्पर्धात्मक स्तर र विदेशी खेलाडीको सहभागितामा थप विस्तार हुने अपेक्षा गरिएको छ ।