बुटवल । नेपाली कांग्रेसको १४ औँ महाधिवेशन अन्तर्गत सोमवार भएको निर्वाचनको मतगणना ढिलो गरी शुरू भएको छ ।
मंगलवार बिहान २ बजेदेखि शुरू गर्ने भनिएपनि मतगणना बिहान पौने ४ बजेमात्रै शुरू भएको छ ।
महाधिवेशन स्थल भृकुटीमण्डप र राष्ट्रिय सभागृहमा सोमबार दिउँसो १२ बजेदेखि सुरु भएको मतदान करिब १२ घण्टापछि ११:४५ मा सकिएको थियो ।
बिहान ८ बजेबाट शुरू हुने भनिएको मतदान ३ घण्टा ढिला गरी शुरू भएको थियो । मतपत्र अभावमा बीचमा पनि मतदान प्रभावित भएको थियो ।
कांग्रेस निर्वाचन समितिका अनुसार ४ हजार ६ सय ७९ मत खसेका छ । ४ हजार ७ सय ४३ मतदाता रहेकोमा ६४ जनाले मतदान गरेका छैनन् ।
सभापति पदमा शेरबहादुर देउवा, शेखर कोइराला, प्रकाशमान सिंह, बिमलेन्द्र निधि र कल्याण गुरुङले प्रतिस्पर्धा गरेका छन् ।
प्रतिक्रिया