सार्वजनिक स्थलमा फोटो/भिडियो खिच्न नपाउने गृहको सूचना प्रति पत्रकार महासंघको आपत्ति

काठमाडौं । गृहमन्त्रालयले सार्वजनिक स्थलमा फोटो भिडियो खिच्ने माथि कारवाही गर्न दिएको चेतावनीलाई नेपाल पत्रकार महासंघले प्रेस स्वतन्त्रता विरोधी आदेशको संज्ञा दिएको छ । महासंघका महासचिव रोसन पुरीले शुक्रबार एक प्रेस विज्ञप्ति प्रकाशित गर्दै विज्ञप्तिमा उल्लेखित कतिपय वाक्यले अभिव्यक्ति तथा प्रेस स्वतन्त्रता प्रतिकुल प्रयोग हुन सक्ने भन्दै चिन्ता प्रकट गरिएको छ ।

महासंघले प्रकाशित गरेको विज्ञप्तिमा ‘व्यक्तिगत गोपनियता र प्रतिष्ठामा असर पर्ने’ भन्ने जस्ता वाक्याँसले प्रेस स्वतन्त्रताको प्रतिकुल प्रयोग हुन सक्ने भन्दै सरकारको ध्यानाकर्षण गराएको छ । महासंघले संविधानले सुनिश्चित गरेको प्रेस तथा अभिव्यक्ति स्वतन्त्रता र नागरिकको संवैधानिक स्वतन्त्रताको सम्मान गर्न सबैलाई आग्रह पनि गरेको छ ।