काठमाडौं । काठमाडौंको नयाँ बानेश्वरस्थित संसद भवन अगाडिको मूल सडकमा राखिएको शंकास्पद प्रेसर कुकरलाई निस्क्रिय बनाइएकोछ ।
नेपाली सेनाको बम डिस्पोजल टोलीले नो एमसीसी लेखिएको शंकास्पद प्रेसर कुकरलाई डिस्पोज गरेको हो । एमसीसीको विरोधमा नेत्रविक्रम चन्दको नेकपासहित साना वामपन्थी दलहरुले आज नेपाल बन्द आह्वान गरेका छन् ।
बन्दलाई सफल पार्ने नाममा आम सर्वसाधारणलाई आतंकित पार्ने गरी मूल सडकमा बम राखिएको थाहा पाउने वित्तिकै प्रहरी र शसस्त्र प्रहरीले वरिपरिको क्षेत्रलाई सिल गरेको थियो । त्यसपछि नेपाली सेनाको बम डिस्पोजल टोली आएर सो प्रेसर कुकरलाई निस्क्रिय बनाएको हो ।
शंकास्पद प्रेस कुकरभित्र कागज र इँटाका टुक्रा रहेका सेनाको डिस्पोजल टोलीका क्याप्टेन सन्दीप थापाले जानकारी दिए । उनका अनुसार कुकरभित्र कुनै पनि विस्फोटक पदार्थ थिएन ।
‘कुकरमा शंका गर्नुपर्ने बस्तु र विस्फोटक पदार्थ पनि थिएन,’ उनले भने, ‘त्यसभित्र कागज र इँटाकोे टुक्रामात्र थियो ।’
मोटरसाइकलमा आएका व्यक्तिले शंकास्पद प्रेसर कुकर राखेर फरार भएका थिए । सीसीटीभी फुटेजका आधारमा उनीहरुको खोजी भैरहेको प्रहरीले जनाएको छ ।
प्रतिक्रिया