काठमाडौं । नेकपा (एकीकृत समाजवादी) अध्यक्ष माधवकुमार नेपालले आफुहरुलाई समाप्त पार्ने षड्यन्त्रलाई समाप्त पारेको दाबी गरेका छन् ।
मंगलबार एमसीसीबारे पार्टीको धारणा सार्वजनिक गर्न आयोजित पत्रकार सम्मेलनमा अध्यक्ष नेपालले फागुन १ मा आफ्नो पार्टीको अस्तित्व समाप्त पार्न खोजेको जिकिर गर्दै त्यो षड्यन्त्रलाई आफुहरुले चुड्कीको भरमा समाप्त पारिदिएको दाबी गरेका हुन् । नेपालले भने ‘हामीलाई निमिट्यान्न पार्न खोज्ने षड्यष्न्त्रहरु एकै मिनेटमा चुड्की बजाएर समाप्त पारिएको छ ।’
फागुन १ गते सर्वोच्च अदालतमा माधवनेपालसहित १४ सांसद विरुद्धको मुद्दा पेशीमा चढेको थियो । तर सत्तारुढ गठबन्धनका सांसदहरुले प्रधानन्यायाधीस चोलेन्द्र शमशेर जबरामाथि महाअभियोग प्रस्ताव दर्ता गरेपछि त्यो पेशी अघि बढेको थिएन ।
अध्यक्ष नेपालले ओली नेतृत्वकै सरकारका कारण एमसीसीबारे भ्रम फैलिएको पनि दाबी गरे । उनले एमसीसीबारे ओली सरकारकै मन्त्रीहरूले भ्रम फैलाएका कारण त्यसको दोषी उनी समेत भएको जिकिर गरे । अहिले एमसीसीबारे १२ बुँदे व्याख्यात्मक घोषणा गरेर आफुहरुले जनतामा रहेको भ्रम पनि हटाउन सफल भएको बताए । उनले भने, ‘एमसीसीबारे पार्टीले स्पष्ट भएर अघि बढ्नुपर्छ भनेर निर्णय गरेको थियो । त्यसलाई प्रस्ट पार्नका लागि १२ बुँदे व्याख्यात्मक घोषणा आएको र त्यसमा विश्वास गर्ने आधार बनेको हो । अहिले जनता पनि प्रस्ट भएका छन्, जनताको भावनाको प्रतिनिधित्व गर्ने पार्टी एकीकृत समाजवादी हो ।’ एमसीसीबारे देखिएको विवाद र आशंका घोषणापत्रले निवारण गरेको दाबी गर्दै उनले नेपाल असंलग्न परराष्ट्र नीतिप्रति प्रतिबद्ध रहेको बताए ।
नेपालले एमाले अध्यक्ष केपी ओलीमा देशभक्तिको भावना नभएको आरोप समेत लगाए । उनले भने, ‘केपी ओलीमा देशभक्तिको भावना छँदैछैन । कम्युनिस्ट हुन लायक छैनन् । म चुनौतीका साथ भन्न चाहन्छु, यदि तर्कको मैदानमा, तर्क प्रस्तुत गर्ने ठाउँमा आउनुस् ।’
नेपालले आफुहरु सभामुख अग्निप्रसाद सापकोटाको पक्षमा उभिने बताए । सभामुख सापकोटाविरुद्ध महाअभियोग लगाउने विषयमा आफ्नो पार्टी कतै सहमत नहुने स्पष्ट पारे ।
प्रतिक्रिया